Па
выніках цэнтралізаванага тэсціравання абітурыентка атрымала 100 балаў па
беларускай мове. Да гэтай перамогі гімназістка ішла разам з настаўніцай беларускай
мовы і літаратуры Жаннай Лапоткай.
На рэпетыцыйных тэсціраваннях Юлія Канончык набірала 82, 86 і 88
балаў. З дзявятага класа дзяўчынка з’ўлялася актыўнай удзельніцай алімпіяднага
руху. Каб паказаць нядрэнныя вынікі, некалькі разоў на тыдзень па некалькі
гадзін рыхтавалася і са школьным настаўнікам, і дома самастойна. Усё разам і
дало такі добры вынік.
— Юля — творчая і ўсебакова развітая дзяўчынка, стараецца кожную
хвіліну выкарыстоўваць з карысцю, — дзеліцца педагог Жанна Мечыславаўна. —
Сёлета яна стала пераможцай раённай алімпіяды па беларускай мове, а таксама
прыняла ўдзел у III этапе абласной алімпіяды па вучэбных прадметах. Залатая
медалістка сур’ёзна адносілася да школьных заняткаў, таму ўсе прадметы заўсёды
ішлі на «ўра». Чаму Юля абрала менавіта беларускую мову — бо мы знайшлі адна
адну. На ўроках мне з ёй заўсёды было лёгка, дарэчы, яна рыхтавала і дадатковы
матэрыял, які быў цікавым не толькі для яе самой, але і для аднакласнікаў. А
яшчэ Юля вельмі сціплая дзяўчынка, заўсёды прыйдзе на дапамогу, вельмі прыгожа
малюе. Цудоўна, калі навучэнцы радуюць сваіх педагогаў, а іх добрыя вынікі —
прычына ганарыцца імі. Юля марыць стаць студэнткай медыцынскага ўніверсітэта,
спадзяюся, што яе мара здзейсніцца.
Дарэчы, задоўга да здачы цэнтралізаванага тэсціравання вучаніца
11-га класа СШ № 2 г. Капыля Вера Васілеўская ўжо атрымала 100 балаў. Дыплом І
ступені па рускай мове і літаратуры, які дзяўчынка заваявала па выніках III
этапа рэспубліканскай алімпіяды па вучэбных прадметах, згодна з правіламі
прыёму ў вышэйшыя навучальныя ўстановы будзе прыраўнаваны да найвышэйшага бала
пры здачы ЦТ па прадмеце.
Дзяўчынка ўпэўнена: каб набраць 100 балаў на ЦТ, дастаткова
школьных падручнікаў і некалькіх дадатковых метадычных дапаможнікаў. Дарэчы,
галоўным навучальным дапаможнікам для Юлі стаў зборнік вучэбна-трэніровачных
тэстаў С.І. Цыбульскай.
— Ад тэсціравання я чакала добрага выніку — вельмі хацелася здаць
яго хоць бы на 90, — адзначае Юля. — Гэта ўдача, што мне трапіўся
варыянт, які быў паспяховым для мяне. А ўвогуле, ёсць пэўная схема і сістэма ў
ЦТ. Прааналізаваўшы трэцяе рэпетыцыйнае тэсціраванне, ты пачынаеш разумець
алгарытм і тое, што ад цябе хочуць. А валодаючы добрым слоўнікавым запасам,
можна атрымаць той вынік, які нават не чакаеш.
Свой 100-бальны сертыфікат разам з дакументамі Юля падала ў
Беларускі дзяржаўны медыцынскі ўніверсітэт на лячэбны факультэт. Дзяўчына
ўпэўнена, што толькі дзякуючы сумеснай працы педагогаў і яе зацікаўленасці пры
падтрымцы бацькоў яна мае такі высокі вынік. Будучым абітурыентам Юля раіць:
каб дабіцца поспехаў на ЦТ, трэба не ленавацца, плённа працаваць — і тады
абавязкова дасягнеце, чаго хацелі.
