У мерапрыемстве прынялі ўдзел больш за 300 народных умельцаў з усёй Беларусі. На плошчы старога горада ў Мінску самыя вядомыя майстры краіны, многім з якіх нададзены ганаровы статус народнага майстра, і тыя, хто з’яўляецца членам рэспубліканскага саюза майстроў народнай творчасці, прадстаўлялі адметнасці свайго рэгіёна.
— Выстава раённага цэнтра ткацтва прыцягвала сваёй прыгажосцю не толькі наведвальнікаў, але і майстроў-удзельнікаў фестывалю: высокі ўзровень і прафесіяналізм семежаўскіх ткачоў, разнастайнасць тэхнік выканання посцілак, дываноў, настольнікаў, ручнікоў, паясоў былі адзначаны, і многія, карыстаючыся магчымасцю, хацелі даведацца пра сакрэты майстэрства, каб прымяніць іх і ў сваёй творчасці. Шмат шчырых слоў было сказана і членамі камісіі начале з доктарам мастацтвазнаўства прафесарам Яўгенам Сахутам наконт таго, што супрацоўнікі цэнтра рухаюцца ў правільным кірунку па захаванні традыцый мастацкага рамяства ткацтва і вышыўкі.
Дарэчы, на выставе была прадстаўлена багатая калекцыя паясоў у разнастайных тэхніках выканання: на ніту, тканыя на кроснах, на дошчачках і на бердзечку з выкарыстаннем розных прыёмаў ткацтва, тканыя дываны і ручнікі, а галоўнае — унікальная вышыўка насцілам ці, як кажуць у Семежаве, нашыванне. Вышыўка насцілам мае лакальнае распаўсюджванне.
Ёй упрыгожвалі жаночыя кашулі, ручнікі, навалачкі ў Капыльскім, Клецкім, Слуцкім і Салігорскім раёнах. Больш па Беларусі яна нідзе не сустракаецца. Такія прыёмы вышывання імітуюць прыёмы закладнога ткацтва ручнікоў, што занесена ў спіс нематэрыяльнай культурнай спадчыны Беларусі.
Свае нашытыя ручнікі для выставы прадставілі жыхары Семежава — народны майстар Беларусі Зінаіда Іванаўна Кравец, Ніна Паўлаўна Рымжа і Марыя Андрэеўна Харковіч. Майстар-клас па вышыўцы насцілам праводзіла народны майстар Беларусі, член ГА «Рэспубліканскі саюз майстроў народнай творчасці», загадчык раённага цэнтра ткацтва Таццяна Волкава, а народны майстар Беларусі, майстар народных мастацкіх рамёстваў раённага цэнтра ткацтва Вера Мікалаевіч дэманстравала ткацтва ручніка на кроснах. Метадыст раённага цэнтра ткацтва Ала Ладыга — ткацтва пояса на дошчачках, а навучэнец школы ткачоў Раман Волкаў – ткацтва пояса на ніту.
Таксама наш раён прадстаўлялі і майстры народнага клуба «Скарбонка», што працуе пры Капыльскім РЦК. Напрыклад, Бярнарда Леаненка, якая з’яўляецца членам рэспубліканскага саюза майстроў народнай творчасці і майстра народных мастацкіх рамёстваў раённага цэнтра традыцыйнай культуры прадстаўляла ласкутнае шыццё, а Наталля Сафронава — ткацтва пояса на бердзечку.
Дзіяна ТКАЧЭНКА
Источник «СП»
