З кіраўніком раёна прыйшлі абмеркаваць набалелыя пытанні чацвёра грамадзян і дзве юрыдычныя асобы. Як звычайна, не абышлося без нараканняў у адрас жыллёва-камунальнай службы.
Жыхарка корп. 2 дома 6 па вул. Партызанскай скардзілася на нізкі ўзровень тэмпературы ў жылых памяшканнях, якая бывае, не дасягае нават сацыяльнага стандарта ў 18 градусаў. Пасля звароту ў ЖКГ у кватэры зрабілі замеры, якія нават перавышалі 19-градусную адзнаку. Жанчына просіць выясніць, у чым жа прычына? Сяргей Пілішчык даў даручэнне адпаведным службам вывучыць пытанне і трымаць заяўку на кантролі.
Жыхарка вул. М. Горкага баіцца, што пасля моцных ападкаў над яе кватэрай будзе працякаць дах. Жанчына таксама прасіла спілаваць дрэвы ў двары дома № 10 і ўстанавіць лавачкі. Пытанне знаходзіцца на кантролі ў службе ЖКГ.
Дэталёвага вывучэння патрабуе зварот жыхаркі в. Васільчыцы для ўступлення ў спадчыну ў жыллёва-будаўнічым кааператыве ў Капылі (кватэра належала яе пакойнай маці, зараз жа на яе пераафармленне не хапае даведкі аб выплаце паявых узносаў). У дадзенай праблеме даручана разабрацца ўсім зацікаўленым службам.
Апошнім часам даволі актуальным з’яўляецца пытанне аб падключэнні электраацяплення. Не абышлося без яго і падчас гэтага прыёму. Магчымасцю карыстання ім у прыватным доме цікавіўся капылянін-інвалід, якому дадзены адпаведныя тлумачэнні.
Прыватны прадпрымальнік прасіў дапамогі ў спагнанні запазычанасці з аднаго з прадпрыемстваў раёна.
Падчас прыёму заслухана пытанне аб вылучэнні зямельнага ўчастка таварыству з абмежаванай адказнасцю.
Сяргей КОЗЕЛ
Фота аўтара
«СП»
