22 чэрвеня, Копыль /Уласн. iнф./. Добры падарунак да прафесійнага свята зрабіла сабе каманда УАЗ “Капыльская ЦРБ”, заняўшы першае агульнакаманднае месца падчас VII абласной спартакіяды работнікаў аховы здароўя, якая ладзілася ў Мар’інай Горцы.
Пад началам свайго нязменнага капітана, загадчыка Быстрыцкай участковай бальніцы Сяргея Царукова, 24 спартсмены-аматары паказалі свой спрыт і сілы ў валейболе (мужчыны і жанчыны), лёгкай і цяжкай атлетыках, перацягванні каната, дартсе. Паспяховае выступленне было адзначана дыпломамі і каштоўным падарункам — тэлевізарам. Трэба сказаць, што сёлетні поспех капыльскіх медыкаў не з’яўляецца нечым асаблівым. І пацвердзіла гэту думку старшыня прафсаюзнага камітэта ўстановы аховы здароўя Людміла Лагун, паведаміўшы, што літаральна кожная спартакіяда такога кшталту прыносіла капылянам прызавыя месцы.
