1 верасня, Копыль /Уласн. інф./. Сярэдняя школа № 2 горада Капыля гасцінна расчыніла дзверы для 48 першакласнікаў, якія 1 верасня на ўрачыстай лінейцы аказаліся ў цэнтры ўвагі. Можа таму хлопчыкі і дзяўчынкі так хваляваліся і шукалі ў натоўпе сваіх маці ці бацьку. Гэта толькі пачатак на доўгай дарозе ў краіну ведаў. І як важна, каб юная змена заўсёды адчувала падтрымку і бацькоў, і настаўнікаў.
Для выпускнікоў 2010 года гэта таксама хвалюючы момант (на здымку). Яшчэ ёсць час максімум сіл і старання прыкласці, каб закончыць школу з найлепшымі адзнакамі і зрабіць правільны выбар у жыцці.
На святочнай лінейцы гучала шмат віншаванняў з новым навучальным годам. Да іх далучыліся таксама прадстаўнік абласнога ўпраўлення адукацыі Рыта Ільіна і намеснік старшыні райвыканкама па пытаннях сацыяльнай сферы і ідэалагічнай рабоце Ала Раеўская.
Першы школьны званок паклікаў на першы ўрок, які прайшоў на тэму «Зямля бацькоў - мая зямля».
