5 кастрычнiка, Копыль /Уласн. iнф./. У мінулыя выхадныя адбыліся апошнія гульні Кубка раёна па футболе. Нагадаем, што турнір праходзіў у некалькі этапаў і ў адну другую турніру прайшлі па дзве гарадскія і сельскія каманды.
У суботу, 26 верасня, футбалісты разыгралі пуцёўкі ў фінал. Першая гульня, дзе сустрэліся “Факел” (дзяржустановы) і “Сармат – МНС”, была відовішчнай і даволі рэзультатыўнай. Гледачы сталі сведкамі пяці галявых момантаў. З лікам 4:1 перамогу святкавалі футбалісты каманды дзяржустаноў. Яшчэ больш цікавай стала сустрэча РСУП “С “Лясное” і філіяла “Браткава”. Фартуна цалкам была на баку апошніх, на рахунку якіх - восем мячоў. А лясноўскія футбалісты так і не здолелі прабіць галкіпера сапернікаў. Канчатковы вынік сустрэчы – 8:0, і філіял “Браткава” выйшаў у наступны тур.
У фінале, які адбыўся на наступны дзень, гульня больш удалася “Факелу”. Ён больш атакаваў, і гэта дало свой плён. Чатыры разы браткаўскі галкіпер даставаў мяч з сеткі, у той час , як суддзя зафіксаваў толькі адно ўзяцце варот каманды дзяржустаноў.
Такім чынам футбалісты “Факела” сталі ўладальнікамі пераходнага кубка раёна. Другое месца заняла, адпаведна, каманда філіяла “Браткава” і на трэцім месцы апынулася “Сармат – МНС”.