12 кастрычнiка, Копыль /Уласн. iнф./. З 8 па 14 кастрычніка ў Капыльскім раёне, як і ва ўсёй рэспубліцы, праходзіць Тыдзень маці.
Адкрыла праграму святочных мерапрыемстваў сустрэча маладых і мнагадзетных сем’яў, якія пражываюць на тэрыторыі Бабаўнянскага сельскага Савета, з супрацоўнікамі ЗАГСа, медыцынскімі і сацыяльнымі работнікамі, псіхолагамі і юрыстамі. У рамках Тыдня таксама – вечары-сустрэчы, ранішнікі, тэматычныя канцэрты, літаратурныя гасцёўні, агеньчыкі, конкурсы творчых работ, букетаў, ток-шоу, інфармацыйныя гадзіны і іншыя мерапрыемствы, якія пройдуць ва ўстановах культуры, адукацыі, ТЦСАН. З 12 па 16 кастрычніка супрацоўнікі тэрытарыяльнага Цэнтра правядуць дабрачынную акцыю “Да сэрца кожнага дзіцяці ключык залаты знайсці” для мнагадзетных маці, якія выхоўваюць шасцярых і больш дзяцей, а ўдзельнікі валанцёрскай групы ўручаць віншавальныя паштоўкі маці-гераіням. 14 кастрычніка ў храме Узнясення Гасподня адбудзецца богаслужэнне “За здароўе ўсіх маці Беларусі” ў гонар свята Пакроваў. На 15 кастрычніка запланавана сустрэча з кіраўніцтвам раёна і ўшанаванне мнагадзетных маці, узнагароджаных ордэнам Маці, а таксама прамая лінія з удзелам зацікаўленых структур “Слухаем вас, матулі”.
