22 кастрычнiка, Копыль /Уласн. iнф./. Шэраг мерапрыемстваў прайшлі ў раёне ў рамках Тыдня маці. Шмат падарункаў, цёплых слоў было выказана ў адрас дарагіх жанчын. Але такога сюрпрыза, які зрабіла адміністрацыя ААТ «Старыца-Агра», не было, бадай, нідзе.
У мінулую суботу ў Старыцкім СДК адбыўся канцэрт, які арганізавалі работнікі ўстановы культуры сумесна з самадзейнымі артыстамі сельгаспрадпрыемства, вучнямі мясцовай адзінаццацігодкі. Напачатку мерапрыемства са святам матуль павіншаваў намеснік старшыні ААТ «Старыца-Агра» па ідэалагічнай рабоце Анатоль Жылко. Ад гаспадаркі Анатоль Аляксандравіч уручыў каштоўны падарунак Алене Гурбан, сёлета ўдастоенай ордэна Маці, а Зінаідзе Ліннік, якая выхоўвае шасцярых дзяцей, - у дадатак ключы ад катэджа. Словы ўдзячнасці ў адрас жанчын гучалі і ад старшыні Слабада-Кучынскага сельскага Савета дэпутатаў Нэлі Гусевай.
Для любых матуль прагучала шмат лірычных вершаў і вядомых песень, якія разам з артыстамі спявала ўся зала.
Сімвалічна, што новае жыллё для мнагадзетнай сям’і Анатоля і Зінаіды Ліннікаў пабудавана ў вёсцы Андросаўшчына на месцы іх першай сустрэчы, дзе калісьці стаяў сельскі клуб. Вяселле згулялі напярэдадні свята жанчын – 4 сакавіка 1995 года. За чатырнаццаць гадоў сумеснага жыцця на свет з’явіліся трое дачок і трое сыноў. Анатоль працуе паляводам, а Зінаіда да водпуску па доглядзе дзіцяці была жывёлаводам. Заўсёды ў вялікай сям’і жылі дружна, дапамагалі адзін аднаму. Цяпер у Ліннікаў прыемны клопат – зрабіць новы дом утульным на радасць сваім дзецям.
