24 снежня, Капыль /Уласн. iнф./. Прафілактыка дарожна-транспартных здарэнняў з удзелам пешаходаў, веласіпедыстаў, матацыклістаў стала асноўнай мэтай сумеснага мерапрыемства, праведзенага 18 снежня бягучага года раённай арганізацыяй рэспубліканскага грамадскага аб’яднання «Белая Русь», райкамам ГА «БРСМ» і аддзелам дзяржаўтаінспекцыі Капыльскага РАУС на базе сельскагаспадарчага прафесійнага ліцэя.
Толькі за адзінаццаць месяцаў бягучага года ў Мінскай вобласці зарэгістравана 1251 ДТЗ, дзе 310 чалавек загінулі і 1403 атрымалі пашкоджанні рознай цяжкасці. З удзелам пешаходаў і веласіпедыстаў адбылося 469 здарэнняў, у якіх 124 чалавекі памерлі і 369 шпіталізаваны.
Не абышла сумная статыстыка і Капыльскі раён. За справаздачны перыяд зарэгістравана 27 ДТЗ, у якіх загінула 5 чалавек. Здзейснены чатыры наезды на пешаходаў і столькі ж – на веласіпедыстаў. Фігурантамі дарожна-транспартных здарэнняў сталі нават дзве гужавыя павозкі. У апошніх дзесяці выпадках асноўнай прычынай стала адсутнасць у пацярпелых святлоадбівальных элементаў. Менавіта на гэта звяртаў увагу старшы дзяржаўтаінспектар АДАІ Капыльскага РАУС капітан міліцыі Міхаіл Мельнічэнка ў гутарцы з навучэнцамі сель-скагаспадарчага ліцэя. Ён таксама адказаў на шэраг пытанняў, якія тычыліся Правілаў дарожнага руху, нюансаў атрымання вадзіцельскіх пасведчанняў разнастайных катэгорый, адзначыў неабходнасць абазначэння пешаходаў, веласіпедыстаў, матацыклістаў, коннікаў флікерамі, каб пазбегнуць нежаданых вынікаў.Першы сакратар РК ГА «БРСМ» Наталля Гарбацэвіч уручыла ўдзельнікам сустрэчы святлоадбівальныя элементы ад РГА «Белая Русь». Такія ж флікеры перададзены і калектыву выкладчыкаў СПЛ - самай вялікай капыльскай пярвічцы рэспубліканскага грамадскага аб’яднання.
