6 студзеня, Капыль /Уласн. iнф./. Новы 2010 – апошні год дзеяння Праграмы адраджэння і развіцця вёскі на 2005-2010 гг. За гэты час у раёне ўведзены ў строй 12 аграгарадкоў. Дзякуючы праводзімай палітыцы ў сельскай мясцовасці новыя абрысы набываюць вуліцы, дамы і будынкі сацыяльна-культурнай сферы.
Змяніўся воблік і вёскі Новыя Доктаравічы, якая ў пачатку 2009 года стала ператварацца ў аграгарадок. Адным з аб’ектаў з’яўляўся будынак мясцовага аддзялення паштовай сувязі, які ўзнік у далёкім 1957 годзе.
Падчас ажыццяўлення праграмы адраджэння і развіцця вёскі была распрацавана праектна-каштарысная дакументацыя, і пасля капітальнага рамонту дзякуючы аб’яднанню “Белпошта” (на рэканструкцыю пайшло больш за 100 млн рублёў уласных сродкаў) аддзяленне паштовай сувязі стала сапраўдным упрыгажэннем вёскі. Сучасны выгляд набыў і інтэр’ер.
Па-новаму пачаў працаваць і калектыў, які больш за год узначальвае Алена Ліпніцкая. На абслугоўванні паштавікоў знаходзіцца шэсць населеных пунктаў – вв. Н. Доктаравічы, Доктаравічы, Навасёлкі, Вуглы, Аткулавічы і Закопанка. Дарэчы, у апошняй амаль у кожнай хаце падпісчыка, куды дастаўляюцца перыядычныя выданні, настольнай з’яўляецца любімая раёнка.
Даведзены да аддзялення план па падпісцы калектыў заўсёды перавыконвае. 600 экземпляраў разнастайных часопісаў і газет дастаўляюць паштальёнкі Галіна Смычнік і Наталля Коршук.