11 студзеня, Капыль /Уласн. iнф./. Святочныя навагоднія дні для Наталлі і Андрэя Катовічаў з вёскі Скабін і Яўгеніі і Ігара Камякоў з Капыля сталі яшчэ больш адметнымі. Справа ў тым, што ў кожнай сям’і з’явілася па маленькай прыгажуні.
3 студзеня ў 7 гадзін 25 хвілін Наталля Катовіч, у якой нарадзілася дзяўчынка ростам 52 сантыметры і вагой 3500 грамаў, у другі раз стала мамай (першынец, якога назвалі Дзянісам, з’явіўся ў 2003 годзе).
На наступны дзень, у 15.35 у радзільным аддзяленні Капыльскай ЦРБ нарадзілася яшчэ адна дзяўчынка. Немаўляці вагой 3120 грамаў і ростам 51 сантыметр, бясспрэчна, радаваліся ўсе родныя сям’і Камякоў.
Па традыцыі павіншаваць матуль з нараджэннем першых жыхароў Капыльшчыны, якія з’явіліся на свет у 2010 годзе, прыехалі старшыня раённага Савета дэпутатаў Марыя Сандрозд, намеснік старшыні райвыканкама Ала Раеўская і начальнік аддзела ідэалагічнай работы Людміла Камкова. Прадстаўнікі раённай “вертыкалі” ўручылі Наталлі Катовіч і Яўгеніі Камяк наборы для немаўлят і навагоднія падарункі, а таксама пажадалі моцнага здароўя, шчасця маладым матулям і іх сем’ям.
