3 лютага, Капыль /Уласн. iнф./. Прайшлі шэраг абласных спаборніцтваў па зімовых відах спорту, дзе ўдзел прымалі і спартсмены Капыльскага раёна.
Усяго адно ачко аддзяліла капылян (у склад каманды ўваходзілі тры юнакі і тры дзяўчыны 1992 – 1993 г. н.) ад вышэйшай прыступкі п’едэстала гонару на Алімпійскіх днях моладзі па лыжных гонках, у праграму якіх уваходзіў бег класічным і свабодным стылямі. У выніку нашы землякі апынуліся на другім месцы. На першым аказаліся гаспадары спаборніцтваў – каманда Барысаўскага раёна (181 ачко), а трэцімі сталі маладзечанскія лыжнікі.
Больш удалым для капылян стаў старт у абласной спартакіядзе сярод ДЮСШ па лыжных гонках, дзе гонар Капыльшчыны адстойвалі спартсмены 1994 – 1995 г. н. Набраўшы 175 заліковых ачкоў, каманда нашага раёна стала яўным лідэрам спаборніцтва. На другой прыступцы апынуліся спартсмены з Лагой-скага (149), а на трэцяй – Мядзельскага раёнаў (110 ачкоў).
Падрыхтоўкай лыжнікаў да абласных спаборніцтваў займаліся трэнеры Анатоль Сянюк, Таццяна Сінюк, Алена Анішчанка і Дзмітрый Була, які разам з Дзмітрыем Гурбанам выступалі прадстаўнікамі капыльскіх каманд.
На алімпійскіх днях Мінскай вобласці па біятлоне сярод ДЮСШ, якія прайшлі 29 – 30 студзеня ў гарадскім пасёлку Плешчаніцы, каманда Капыльскай спартыўнай дзіцяча-юнацкай школы алімпійскага рэзерву заняла трэцяе месца.
У асабістым першынстве вылучыліся Максім Некраш і Вераніка Дмітранок, якія ў сваіх групах падняліся на ганаровае трэцяе месца.
У Капылі прайшлі занальныя абласныя спаборніцтвыпа зімовым мнагаборстве комплексу “Абаронца Айчыны” ў рамках абласной спартакіяды дапрызыўнай і прызыўной моладзі. Упэўненую перамогу святкавалі капыльскія мнагаборцы.
