3 лютага, Капыль /Уласн. iнф./. З 1 лютага ў г. Мінску пачалі работу падрыхтоўчыя зборы для ўдзельнікаў IV этапа рэспубліканскай прадметнай алімпіяды, у якой выступяць і пяць прадстаўнікоў Капыльшчыны.
Разам са сваімі аднагодкамі яны бралі ўдзел у абласным этапе алімпіяды і сталі яе пераможцамі і прызёрамі. Дыпломы І ступені па прадмеце “Працоўнае навучанне” прывезлі вучні УА “Грозаўская ДАСШ” Дзмітрый Цвірка (11 клас) і Мікалай Барысюк (9 клас), рыхтаваў іх настаўнік І. В. Дубіна. Другія месцы занялі: па біялогіі — Дзмітрый Пяткевіч, адзінаццацікласнік з УА “ДАСШ № 2 г. Капыля” (настаўніца Г. У. Загароўская), па гісторыі — Дзмітрый Чалевіч, вучань 11 класа гэтай жа навучальнай установы (настаўніца С. А. Юрчэня). Трэцімі ў сваіх намінацыях сталі: па інфарматыцы — сямікласнік УА “ДАСШ № 2 г. Капыля” Уладзіслаў Быліновіч (настаўнік Д. М. Ляшчэвіч), па працоўным навучанні — Алеся Чараховіч, вучаніца 9 класа УА “Цімкавіцкая ДАСШ (настаўніца Г. М. Федаровіч). Усяго ж на ІІІ этапе рэспубліканскай прадметнай алімпіяды навучальныя ўстановы Капыльскага раёна прадстаўлялі 15 вучняў.
Няпростыя выпрабаванні чакаюць юных эрудытаў на фінальных спаборніцтвах, якія пройдуць з 29 сакавіка па 3 красавіка.
