15 лютага, Капыль /Уласн. iнф./. Дваццаць адзін год таму, 15 лютага 1989 года, апошні савецкі салдат пакінуў тэрыторыю Афганістана. Па-рознаму ацэньваюць падзеі, што адбываліся на той вайне, палітыкі, гісторыкі, але ў памяці простых людзей нашы воіны нязменна застануцца сапраўднымі героямі, адданымі воінскаму доўгу, прысязе.
У Дзень памяці воінаў-інтэрнацыяналістаў кіраўніцтва раёна, ветэраны вайны ў Афганістане ўшаноўвалі памяць землякоў, якія загінулі на чужыне, выконваючы свой воінскі абавязак. Старшыня раённага выканаўчага камітэта Міхаіл Бода, старшыня раённага Савета дэпутатаў Марыя Сандрозд, ваенны камісар райваенкамата Сяргей Барташэвіч, воіны-“афганцы” ўсклалі кветкі да памятнага знака воінам-інтэрнацыяналістам, ушанавалі іх памяць мінутай маўчання.
У зале раённага Цэнтра культуры ўдзельнікі мерапрыемства паглядзелі дакументальную хроніку аб вывадзе савецкіх войскаў з Афганістана, мастацкі фільм “У тыле ворага”. А пасля адбыўся канцэрт, падрыхтаваны настаўнікамі і выхаванцамі Дзіцячай школы мастацтваў.
