21 кастрычніка, Копыль /Уласн.інф./. Адбыўся традыцыйны раённы конкурс “Супермама года”, прымеркаваны да Дня Маці. Конкурс праходзіў на базе Слабадакучынскай сярэдняй школы і сабраў вялікую колькасць гледачоў з ліку навучэнцаў, педагогаў, вяскоўцаў.
За высокі тытул змагаліся пяць удзельніц – прадстаўніц Слабада-Кучынскага і Бабаўнянскага сельскіх саветаў: Святлана Лазарэвіч з в.Бабоўня, Ганна Кісель з в.Леткаўшчына, Марына Пратасевіч, Наталля Жук, Алена Дзмітрыева з в.Слабада-Кучынка. Праграма конкурсу была насычанай і шматпланавай, бо за кароткі прамежак часу маладыя матулі змаглі прадэманстраваць свае творчыя здольнасці і захапленні, расказаць пра сябе і сваю сям’ю, раскрыць лепшыя рысы свайго характару. Кампетэнтнае журы ў складзе старшыняў Сл.-Кучынскага і Бабаўнянскага сельвыканкамаў Нэлі Гусевай і Ірыны Запольскай, першага сакратара РК ГА “БРСМ” Наталлі Гарбацэвіч, педагога РЦДТ Вольгі Максімені ацанілі поспехі жанчын.
Пераможцаю конкурсу стала Ганна Кісель. Разам з мужам Міхаілам Мікалаевічам Ганна выхоўвае шасцярых дзяцей школьнага ўзросту. Усе яны з’яўляюцца навучэнцамі ДУА “Лясноўская агульнаадукацыйная сярэдняя школа”. Карына, Яўген, Уладзімір, Лізавета, Вікторыя, Віталь – вось рознакаляровая палітра дзіцячых іменаў дружнай сям’і Кісель. Самая старэйшая з іх – дзевяцікласніца Карына, малодшы Віталік – другакласнік. Працалюбівая, клапатлівая, уважлівая – так характарызуюць сваю матулю дзеці. Ганна Якаўлеўна - хатняя гаспадыня, Міхаіл Мікалаевіч працуе механізатарам у РСУП “Саўхоз Лясное”.
