25 февраля, Копыль /Соб. инф./. ААТ “Старыца-Агра” святкуе сваё 80-годдзе. Багатая і цікавая біяграфія сельгаспрадпрыемства: адбылося некалькі рэарганізацый, не раз гаспадарка мяняла сваё імя.
Прадпрыемства заўсёды вызначалася сваімі высокімі паказчыкамі. Высокую ацэнку атрымала гаспадарка і яе кіраўнік у ходзе леташняга наведвання Капыльскага раёна Прэзідэнтам Рэспублікі Беларусь Аляксандрам Лукашэнкам.
Сёння ААТ “Старыца-Агра” — буйнатаварнае прадпрыемства па вырабе сельскагаспадарчай прадукцыі, якое з’яўляецца яркім прыкладам паспяховай рэалізацыі Дзяржаўнай праграмы адраджэння і развіцця аграпрамысловага комплексу. Кіраўнік гаспадаркі У.А. Рудакоўскі з’яўляўся дэлегатам ІV Усебеларускага народнага сходу ад Капыльшчыны (дарэчы, рабіў гэта ўжо чацвёрты раз). Прагнозныя паказчыкі, даведзеныя ААТ “Старыца-Агра” на пяцігодку, практычна выкананы.
Значны скачок у вытворчасці прадукцыі адбыўся за кошт нарошчвання аб’ёмаў, укаранення інтэнсіўных тэхналогій у вырошванні ўсіх культур, набыцці сучаснай, больш эканамічнай тэхнікі, якая дазваляе паляпшаць культуру земляробства, рэканструкцыі і будаўніцтва вытворчых памяшканняў.
Згодна з Указам Прэзідэнта Рэспублікі Беларусь № 322 у канцы 2009 года пабудаваны малочнатаварны комплекс “Андросаўшчына” на 700 галоў дойнага статка, праведзена рэканстукцыя фермы ў Старыцы, зманціраваны новыя даільныя залы на МТФ “Бадзяжы” і “Чарнічнае”. У 2010 годзе гаспадарка атрымала 3 млрд 200 млн чыстага прыбытку.
Значнай падзеяй у жыцці жыхароў вёскі Старыца стала тое, што яна набыла статус аграгарадка. Уведзена ў строй 60 новых дамоў, і яны працягваюць будавацца, новы штуршок атрымала развіццё інфраструктуры. Клапоцяцца ў сельгаспрадпрыемстве і пра падрастаючае пакаленне: штодня аўтобус аб’язджае навакольныя вёскі, збірае малышоў у дзіцячы сад, а ўвечары дастаўляе дамоў, школьнікам — выдатнікам вучобы — выплачваецца стыпендыя.