29 сакавiка, Капыль /Уласн. iнф./. Лідарам сярод аператараў машыннага даення кароў па выніках першых двух месяцаў 2011 года ў раёне з’яўляецца Алена Гушчэня з малочнатаварнага комплексу “Андросаў-шчына” ААТ “Старыца-Агра”. Яна атрымала 1389 кг малака ад кожнай каровы.
У гаспадарцы налічваецца 1300 галоў кароў. Большасць з іх знаходзяцца на стойлавым утрыманні, пераведзены на аднатыпны від кармлення. Заўсёды хапае сенажу і сіласу, поўнасцю забяспечаны канцэнтратамі. І ў станоўчых перавагах такога ўтрымання пераконваюць рэзультаты. Па вытворчасці малака за мінулы год дасягнуты шасцітысячны рубеж па надоі ад адной каровы. Зараз у гаспадарцы выйшлі на мінулагодні ўзровень і атрымліваюць па 16 кг 400 г, улічваючы тое, што статак павялічыўся больш чым на 200 галоў. Па валавым зборы кожны месяц на Капыльскі МСЗ паступае каля 20 т малака гатункамі экстра і вышэйшым, што ў фінансавым выражэнні складае каля 700 млн рублёў.