8 чэрвеня, Капыль /Уласн. iнф./. Капыльскім райспажыўтаварыствам праведзена маштабная работа з прадпрыемствамі гандлю па зніжэнні гандлёвых надбавак на тавары імпартнай і айчыннай вытворчасці з найбольш высокім узроўнем росту адпускных цэн пастаўшчыкамі.
Апошнім часам адбылося зніжэнне гандлёвых надбавак на крупы ў асартыменце, на каву і чай – 10%. Аналагічнае зніжэнне адбылося і на імпартную садавіну і агародніну (на 10 —15%). Спецыялісты райспажыўтаварыства праводзяць маніторынг гандлёвай сеткі, які паказвае, што сітуацыя на спажывецкім рынку стабілізавалася. Ажыятажнага попыту на якія-небудзь тавары няма. Больш за тое, таварныя запасы ў рознічнай сетцы не зніжаны і дазваляюць бесперабойна гандляваць. Па стане на 1 чэрвеня яны складаюць 7 млрд рублёў – гэта ў сярэднім на 30 дзён гандлю, па харчовых таварах – на 22 дні.
Увядзенне свабодных цэн не паўплывала на рост гандлёвых надбавак. Райспажыўтаварыства іх увогуле не завышае. Прадпрыемствы гандлю маюць на мэце прымяняць паніжаныя памеры надбавак і пры наступных паступленнях тавараў.
