15 июля, Копыль /Соб. инф./. Тэма добраўпарадкавання населеных пунктаў знаходзіцца на пастаянным кантролі ў раённым выканаўчым камітэце і раённым Савеце дэпутатаў практычна штотыднёва. Адсочваюцца работы, праведзеныя ў гэтым напрамку сельвыканкамамі, працоўнымі калектывамі, жыхарамі раёна.
У сельскай мясцовасці на платнай аснове выкананы вялікія аб’ёмы: за паўгода спілавана 715 аварыйна-небяспечных дрэў, знесены 21 пустуючы дом, 9 км старых агароджаў, адрамантавана і ўстаноўлена новых — па 7 км, 5 км пафарбавана насельніцтвам за свой кошт.
Вядзецца вялікая растлумачальная работа. Так, вяскоўцы ўжо прызвычаіліся да збору смецця жыллёва-камунальнай службай. Таксама яны азнаёмлены з патрабаваннямі па добраўпарадкаванні індывідуальных жылых забудоў. Людзі ведаюць іх і імкнуцца выконваць. На бліжэйшую перспектыву плануецца знос 63 старых пабудоў і рэкультывацыя 40 міні-палігонаў.
Сёлета праходзіць традыцыйны конкурс на лепшую сядзібу, вуліцу, вёску. Яго вынікі будуць падведзены ў жніўні. Зараз камісіі працуюць і выязджаюць на месцы, каб вызначыць лідараў сярод моладзі, ветэранаў працы і іншых катэгорый. На тэрыторыі кожнага сельскага Савета ёсць сядзібы, што вылучаюцца сваёй арыгінальнасцю, дагледжанасцю, прыгажосцю. Прыемна, што ў іх ліку ўсё больш новых сем’яў. А вось сярод населеных пунктаў асаблівую ўвагу прыцягваюць вёскі Бабаўнянскага сельскага Савета.
