4 жнiўня, Капыль /Уласн. iнф./. Капыльскаму раёну да выканання дзяржзаказу па продажы харчовай пшаніцы застаюцца лічаныя дні. Планавае заданне ў 15 000 тон ужо выканана больш як на 96%. Работа Цімкавіцкага вытворчага ўчастка “Клецкі камбікормавы завод” сёлета распачалася з 13 ліпеня, калі паступіла першая партыя зерня з ААТ “Скабін”. І наогул, менавіта гэта гаспадарка першай справілася з даведзеным заданнем па продажы пшаніцы дзяржаве. За ёй падцягнуліся і іншыя: ААТ “Семежава”, “Душава”, “Прагрэс-2010”, “Праснакі”, “Суворава-Агра”, П-з “Дусаеўшчына”, “Капыльскае”, ф-л “Лакнея”, СГФ “Крыніца”. Гэтыя гаспадаркі таксама выканалі, а некаторыя і перавыканалі дзяржзаказ. Ды і ў іншых засталіся лічаныя тоны да закрыцця плана.
Пшаніца сёлета ўрадзіла вельмі добрая, уся была прынята ІІІ класам, адпавядае неабходным патрабаванням. Участак працуе кругласутачна. У рабоце занята каля 50 чалавек, з якіх толькі 20 — пастаянныя. Паралельна з прыёмкай збажыны (акрамя пшаніцы, сюды ўжо паступае жыта і піваварны ячмень), ідзе дапрацоўка рапсу і фуражнага зерня для Клецкага камбікормавага завода. З гэтай мэтай і быў пабудаваны сучасны збожжасушыльны комплекс СЗК-40.
Адна за адной сюды прыбываюць аўтамашыны, да верху нагружаныя залацістай збажыной — тэхніка выдзелена ААТ “Аўтапарк №21”, ААТ “Капыльскі райаграсервіс”, самімі гаспадаркамі, працуюць і тры аўтамабілі з Барысаўскага камбіната хлебапрадуктаў, куды і накіроўваецца пшаніца.