19 жніўня, Капыль /Уласн. інф./. Толькі што на палетках ААТ «Старыца-Агра» працавалі камбайны, а ўжо актыўна ідзе закладка будучага ўраджаю.За апошняе дзесяцігоддзе плошча раллі ў ААТ «Старыца-Агра» павялічылася амаль у два разы, што дазваляе яму сёння вырошчваць разнастайную прадукцыю раслінаводства і ствараць выдатную кармавую базу для жывёлагадоўчай галіны.
Прэзідэнтам краіны быў вызначаны тэрмін заканчэння ўборачнай кампаніі - 20 жніўня. Дакладна пастаўленая задача павінна дакладна выконвацца - у гаспадарцы гэта закон. Збожжавыя, якія займалі плошчу 2015 га, былі ўбраны з палёў ужо 12 жніўня. Валавы збор склаў 10 400 тон (летась - 9800), дзякуючы чаму ААТ “Старыца-Агра” выканала дзяржзаказ і разлічылася з прадпрыемствамі, якія забяспечваюць гаспадарку камбікармамі. Таксама аператыўна зжалі і прысядзібныя ўчасткі насельніцтва. Яшчэ раней своечасова быў убраны рапс, ураджайнасць якога сёлета склала 39 ц/га. Нарыхтавана 1500 тон насення гэтай культуры. Два камбайнавыя экіпажы сельгаспрадпрыемства аказвалі дапамогу на ўборцы збожжавых суседзям - РСУП «Бабоўня».
Цяпер з палёў актыўна прыбіраюць салому, каб вызваліць палі для ўзворвання і наступнай сяўбы. На палях працуюць сем айчынных прэсаў і адзін імпартны. Адначасова вядзецца ўборка цюкоў, для чаго створаны два звёны, ўносіцца арганіка..
Відавочна, што для адкрытага акцыянернага таварыства асноўным крытэрыем у работе з’яўляецца рэнтабельнасць. Таму кожны крок тут робяць ў намечаны тэрмін.