23 верасня, Капыль /Уласн. iнф./Сёлета ў ААТ “Капыльскае” пад кукурузу адведзена 2094 гектары, з іх 750 – на зерне. Разлікі на кукурузу сёння апраўдваюцца: гэта культура дазволіць мець паўтара-, двухгадовы запас кармоў. Такая неабходнасць абумоўлена круглагадовым аднатыповым відам кармлення буйной рагатай жывёлы, якой у гаспадарцы налічваецца 2400 галоў. Корм павінен быць цалкам збалансаваным, адпавядаць рацыёну (страваванне жывёл разлічана на грубыя кармы), але асноўная стаўка - на кукурузны сілас.
“Каралева” палёў паспела некалькі раней, бо і ў жніўні, і ў верасні надвор’е было даволі засушлівае.
Таму частка кукурузных плошчаў, якія знаходзяцца на ўзвышэннях, убіраюцца ў першую чаргу.
Добра адладжаны працоўны канвеер дазваляе захоўваць тэхналогію закладкі сіласу. Штодзённа ў траншэі ідзе па 1000 – 1100 тон масы. А ўвогуле неабходна назапасіць 19 500 т пажыўнага корму.
Сёння кукуруза – культура, якая выкарыстоўваецца не толькі на сілас, але і на зерне. Першыя ўбраныя палеткі далі ўраджайнасць 75 ц/га. Зерне кукурузы – вельмі пажыўны корм, які неабходны для дасягнення запланаваных прываг у свінагадоўлі. А ў гаспадарцы на ўтрыманні знаходзіцца больш за 35 тысяч галоў свіней. Таму зразумела, што забяспечанасць гэтымі кармамі напрамую ўплывае і на фінансавую стабільнасць ААТ “Капыльскае”.
