29 верасня, Капыль /Уласн. iнф./ Гаспадаркі раёна поўным ходам вядуць уборку цукровых буракоў.
Ужо прыбрана 1725 гектараў салодкага караняплода, што складае 31% усёй плошчы. Самымі высокімі тэмпамі работы вядуцца ў ААТ “Суворава-Агра” (100%), “Семежава” (52%), “Старыца-Агра” (50%), “Капыльскае”, “Мажа-Агра” (47%).
З агульнай плошчы ворыўнай зямлі ў амаль 2700 га аграрыі сельскагаспадарчага філіяла “Руднае” восьмую частку адводзяць пад цукровыя буракі. Гэту культуру ў гаспадарцы вырошчваюць даўно і ведаюць дасканала, якія гатункі насення прыдатныя для руднянскіх палеткаў.
Дзякуючы выкарыстанню сучасных тэхналогій, комплексных камбінаваных угнаенняў удалося дасягнуць нядрэннай ураджайнасці. У гэтым годзе яна складае каля 380 цэнтнераў на круг, што амаль на ўзроўні сярэднераённага паказчыка (400 ц/га). На дадзены момант у сельгасфіліяле прыбрана 80 га салодкага караняплода, накапана 3050 тон. Яго цукрыстасць складае 16,04%, што нават крыху вышэй за базісную (16%).
У лік дзяржзаказу на Слуцкі цукровы камбінат неабходна паставіць 13 тыс. тон буракоў новага ўраджаю. З гэтай задачай справіцца па сілах, упэўнены ў сельгаспрадпрыемстве. А ўвогуле ўборку плануецца завяршыць у першай палове кастрычніка.