"Імпульс гэтаму працэсу нададуць падпісаныя пагадненні, перш за ўсё дарожная карта супрацоўніцтва Беларусі і Манголіі на 2027-2029 гады, - сказаў кіраўнік дзяржавы. - Таксама мы з маім калегам дэталёва прааналізавалі ход выканання дамоўленасцей, дасягнутых ва Улан-Батары ў 2024 годзе. У асобных сферах, у прыватнасці па пастаўках прадуктаў харчавання, нам удалося даволі сур'ёзна рушыць наперад. На траекторыю росту выйшла двухбаковае эканамічнае ўзаемадзеянне, аднак яго значны патэнцыял яшчэ давядзецца рэалізаваць у поўнай меры".
Аляксандр Лукашэнка адзначыў, што дадатковым магутным інструментам, які бакі задзейнічаюць для гэтага, з'яўляецца Часовае гандлёвае пагадненне паміж дзяржавамі - членамі ЕАЭС і Манголіяй, якое ўступіла ў сілу ў ліпені бягучага года. Гэта пагадненне істотна знізіла бар'еры для бізнесу абедзвюх краін. Цяпер стаіць задача дапамагчы дзелавым колам правільна і аператыўна гэтым скарыстацца.
Прэзідэнт звярнуў увагу, што беларускі бок падтрымліваў мангольскіх сяброў пры падрыхтоўцы гэтага дакумента і лічыць добрым знакам, што ён быў падпісаны ў Мінску ў перыяд старшынства Беларусі ў ЕАЭС. Ён таксама заявіў аб гатоўнасці і далей аказваць падтрымку ў пытаннях далейшага супрацоўніцтва.
"Сёння мы намецілі далейшыя ключавыя кропкі росту ў беларуска-мангольскім супрацоўніцтве. Перш за ўсё гэта прамысловая кааперацыя", - расказаў беларускі лідар.
Пацверджана гатоўнасць Беларусі забяспечваць патрэбнасці Манголіі ў надзейнай кар'ернай, пасажырскай і камунальнай тэхніцы, а таксама развіваць сэрвісную інфраструктуру.
"Новы цікавы напрамак - лёгкая прамысловасць, дзе мы пачалі разам вырабляць тканіны з лёну і кашміру. Гэта будзе ўнікальны і экалагічны прадукт, які спалучае прахалоду беларускай прыроды і цяпло мангольскіх стэпаў. Не проста палатно, а сімвал жывога перапляцення дзвюх культур і нашых эканомік", - адзначыў Прэзідэнт Беларусі.
Аляксандр Лукашэнка таксама бачыць добрыя перспектывы для развіцця супрацоўніцтва ў сферы аграпрамысловага комплексу: "Беларусь гатова ўнесці важкі ўклад у падтрыманне харчовай бяспекі Манголіі. Наш патэнцыял і мангольскі маштаб проста падштурхоўваюць да буйных праектаў. Будзем паскарацца з будаўніцтвам малочнатаварных комплексаў, актывізуем трансфер беларускіх аграрных тэхналогій".
Кіраўнік дзяржавы перакананы, што падпісаныя дакументы і дасягнутыя дамоўленасці прынясуць адчувальную эканамічную выгаду абедзвюм краінам і паслужаць далейшаму павышэнню дабрабыту народаў Беларусі і Манголіі.
Аляксандр Лукашэнка падзякаваў Ухнаагійн Хурэлсуху за прадметны і плённы дыялог на працягу двух дзён, адзначыў змястоўнасць праведзеных перагавораў. Ён запрасіў мангольскага лідара зноў прыязджаць у Беларусь, каб яшчэ бліжэй пазнаёміцца з краінай і яе прыродай.
"Візіт у адказ мангольскага лідара прадаўжае добрую традыцыю сустрэч на вышэйшым узроўні, закладзеную намі ў чэрвені 2024 года. Мы сустракаліся і пасля гэтага, у тым ліку ў ходзе мерапрыемстваў Шанхайскай арганізацыі супрацоўніцтва. Але цяперашні візіт, несумненна, дапаможа замацаванню якасна новага ўзроўню адносін дзвюх краін. Нягледзячы на геаграфічную аддаленасць, Беларусь і Манголію звязваюць агульныя інтарэсы, міралюбны, узважаны, прагматычны курс у знешняй палітыцы, даўнія традыцыі дружбы і супрацоўніцтва паміж народамі", - сказаў Прэзідэнт Беларусі.-0-
Источник: belta.by
