Камітэт эканомікі Мінскага аблвыканкама склаў рэйтынг раёнаў Мінскай вобласці. Пры гэтым улічвалася 23 паказчыкі сацыяльна-эканамічнага развіцця за першыя тры гады пяцігодкі і першае паўгоддзе 2019 г.
Крытэрыямі ацэнкі рэгіёнаў сталі сярэдняя заработная плата, узровень зарэгістраванага беспрацоўя, міграцыйны прырост або змяншэнне, запазычанасць у выручцы ад рэалізацыі прадукцыі, тавараў або паслуг і інш.
- Дастаткова паглядзець, дзе людзі хочуць жыць, а дзе колькасць насельніцтва на працягу некалькіх гадоў пастаянна скарачаецца, каб адказаць на пытанне, якія рэгіёны з'яўляюцца прывабнымі для людзей, а якія знаходзяцца ў дэпрэсіўным стане, - адзначае старшыня камітэта эканомікі Таццяна Бранцэвіч.
Пяцёрка лідэраў
Смалявіцкі раён (1 месца за 2016 - 2018 гады і 9-е месца за першае паўгоддзе 2019 года),
Дзяржынскі (2/1),
Мінскі (3/3),
Салігорскі (4/2)
горад Жодзіна (5/5).
Па выніках працы за 1-е паўгоддзе палепшылі сваё становішча Дзяржынскі і Салігорскі рэгіёны, стабільна без змен спрацавалі Мінскі раён і г. Жодзіна. Смалявіцкі раён упаў на некалькі пазіцый па ўсіх паказчыках.
У буйных раёнах вобласці, такіх як Барысаўскі, Маладзечанскі і Салігорскі, распрацаваны планы паскоранага сацыяльна-эканамічнага развіцця. зыходзячы з аналізу, праведзенага камітэтам эканомікі, можна зрабіць выснову, што Салігорскі раён развіваецца паскоранымі тэмпамі.
- У Салігорскім раёне па выніках першага паўгоддзя 2019 года назіраецца станоўчая міграцыя насельніцтва і самая высокая заработная плата, - кажа Таццяна Бранцэвіч. - Барысаўскі і Маладзечанскі раёны займаюць апошнія месцы ў табліцы па міграцыйны руху насельніцтва, маючы не самыя высокія тэмпы росту рэальнай заработнай платы.
Тым не менш Барысаўскі раён некалькі палепшыў сваё рэйтынгавае становішча (12/10), а па ўзроўні прамысловай вытворчасці рэгіён мае паказчык вышэй за сярэднеабласны.
Маладзечанскі раён апусціўся ў рэйтынгу з 10 месца на 17-е. гэта звязана са зніжэннем аб'ёмаў будаўніча-мантажных работ і невысокім індэксам вытворчасці прадукцыі сельскай гаспадаркі і рознічнага тавараабароту.
Найбольш нізкія паказчыкі - у Вілейскага, Крупскага, Слуцкага, Капыльскага і Валожынскага раёнаў. Пры гэтым з названай пяцёркі толькі Крупскі раён за першае паўгоддзе 2019 года не палепшыў сваё рэйтынгавае становішча.
Даведачна: Эканамічны рост Мінскай вобласці ў першым паўгоддзі 2019 года забяспечаны на ўзроўні 105,3% (пры прагнозе 102,3%). За 7 месяцаў - 105,8%. Усе галіны эканомікі ўнеслі станоўчы ўклад у фарміраванне валавога рэгіянальнага прадукту.
У знешнеэканамічнай дзейнасці ў Мінскай вобласці трэці год запар назіраецца станоўчая дынаміка. Штогадовы прырост выручкі ад экспарту тавараў складае каля 15%, ад экспарту паслуг - ад 22% да 29%.
Крыніца: minsk-region.gov.by