Медыкі вывучылі праблему зніжэння нараджальнасці, пытанні здароўя жаночага насельніцтва Валожынскага раёна. Па падліках спецыялістаў, колькасць абслугоўваемага насельніцтва тут больш за 33 тыс.чалавек, з іх жанчын - звыш 17 тыс. (у рэпрадуктыўным узросце каля 7 тыс.). Паўстала неабходнасць павышаць узровень ведаў і дасведчанасці жыхарак раёна аб магчымасці захаваць сваё здароўе, ранніх прыкметах захворванняў і бясплоддзі, варыянтах іх лячэння і дыягностыкі, методыках вядзення родаў і многае іншае. Так з'явілася ідэя правесці першы ў раёне марафон "Жаночае здароўе".
Уся карысная інфармацыя будзе падавацца ў зразумелай і цікавай форме, кансультацыі высокакваліфікаваных спецыялістаў будуць праходзіць у фармаце жывых зносін. Будуць арганізаваны шэсць зон розных тэматык, сярод якіх "Жаночае здароўе ў рэпрадуктыўным узросце", "Усё пра роды...", "Па якім аналізе можна вызначыць, ці пагражае вам рак", "Чаму ў некаторых выпадках тэст дае станоўчы вынік, хоць жанчына здарова", "Сувязь жаночага здароўя і гармонаў шчытападобнай залозы і не толькі". Кожную зону будзе суправаджаць спецыяліст: акушэр-гінеколаг, псіхолаг, касметолаг, эндакрынолаг, а таксама лекар лабараторнай дыягностыкі.
Падчас марафону запланаваны бясплатныя флюараграфія, цыталогія, лабараторныя даследаванні: аналіз крыві на онкамаркеры, ВІЧ, гармоны шчытападобнай залозы. Таксама плануецца правядзенне УГД органаў малога таза. Дасведчаны лекар-касметолаг раскажа аб тыпе скуры і дасць усе рэкамендацыі па доглядзе.
Прыходзіць на марафон мамы могуць з дзецьмі - для самых маленькіх наведвальнікаў будзе арганізаваны дзіцячы пакой, для тых, хто старэйшы, запланавана забаўляльная праграма, а таксама пляцоўка з аквагрымам. Будзе таксама абсталявана спецыяльнае памяшканне для кармлення грудных дзяцей.
Крыніца: minsk-region.gov.by
