Дзейнасць па праекце рэалізуецца трэці год. Дзякуючы працы валанцёрскай групы наладжана псіхасацыяльная падтрымка сем'ям, якія выхоўваюць дзяцей з асаблівасцямі псіха-фізічнага развіцця. Для працы гэтай прыцягваюцца вузкія спецыялісты, новыя валанцёры і новыя ўдзельнікі. Нядаўна да Чырвонага Крыжа далучыліся чацвёра новых валанцёраў для рэалізацыі міні-ініцыятывы.
У склад ініцыятыўнай групы ўваходзяць яе кіраўнік - намеснік дырэктара сярэдняй школы №2 горада Смалявічы Ірына Астапкіна, педагог сацыяльны Алена Мікуліч, старшыня Смалявіцкай раённай арганізацыі БТЧК Галіна Мікалаеўна Графутка і навучэнцы школы.
На мінулым тыдні валанцёры Чырвонага Крыжа на базе сярэдняй школы №2 г. Смалявічы правялі спартыўнае свята з навучэнцамі. Асноўная мэта мерапрыемства - сацыялізацыя дзяцей з асаблівасцямі псіхафізічнага развіцця сродкамі спартыўнай інклюзіі. Дадатковая адукацыя з'яўляецца важнай часткай адукацыйнага працэсу па сацыялізацыі дзяцей з асаблівасцямі псіхафізічнага развіцця. Заняткі даюць дзецям магчымасць набыць не толькі цэлы шэраг карысных практычных уменняў і навыкаў, але і стымулююць асобасны рост дзіцяці, яго псіхічнае і эмацыйнае развіццё і аздараўленне.
У пачатку мерапрыемства Галіна Мікалаеўна павітала і распавяла аб праекце і дзейнасці валанцёраў Чырвонага Крыжа ў нашым раёне. А затым валанцёры праспявалі для хлопчыкаў і дзяўчынак песню і прыступілі да спартыўных спаборніцтваў. Вучні падзяліліся на дзве каманды і пры падтрымцы і падказках валанцёраў ўдзельнічалі ў спартландыі. Хвіліны радасці, запалу і здароўя падарылі дзецям спартыўныя спаборніцтвы. А завяршылася мерапрыемства вялікім танцавальным флэшмобам.
У Смалявіцкай раённай арганізацыі БТЧК сёння робіцца многае, ёсць мноства ідэй і задумак на перспектыву. Будуць акцыі, сустрэчы, гутаркі, паездкі... Але самае галоўнае – заўсёды ёсць і будзе дапамога кожнаму, хто ў ёй мае патрэбу.
Крыніца: minsk-region.gov.by
