У мерапрыемстве прынялі ўдзел 19 каманд - 95 навучэнцаў з 12 раёнаў: Барысаўскага, Дзяржынскага (3 каманды), Клецкага, Лагойскага, Любанскага, Нясвіжскага (2 каманды), Пухавіцкага, Слуцкага (2 каманды), Смалявіцкага (2 каманды), Салігорскага, Стаўбцоўскага, Чэрвеньскага (3 каманды).
Старшыня журы турніру - Арцём Алегавіч Буры, выкладчык фізікі ліцэя БДУ, члены журы - выкладчыкі, студэнты фізічнага факультэта і факультэта радыёфізікі і камп'ютарных тэхналогій БДУ, якія неаднаразова былі ўдзельнікамі і пераможцамі рэспубліканскіх і міжнародных турніраў юных фізікаў, настаўнікі фізікі Мінскай вобласці, якія маюць вялікі вопыт падрыхтоўкі каманд да турніраў.
Турнір сабраў аматараў фізікі, навучэнцаў 7-11 класаў устаноў адукацыі Мінскай вобласці. Усе каманды былі добра падрыхтаваныя: хлопцы паказалі майстэрства вядзення дыскусіі, уменне адстойваць свой пункт гледжання, аргументавана даваць адказы.
Члены журы аднадушна адзначылі ўзрастаючую папулярнасць турніру юных фізікаў сярод навучэнцаў і педагогаў Міншчыны, а таксама павышэнне якасці рашэння і падрыхтоўкі задач.
Па выніках турніру першае месца заняла каманда Слуцкага раёна. Дыпломамі другой ступені ўзнагароджаны каманды са Стаўбцоўскага раёна, Нясвіжскай гімназіі, Ліцэя г. Барысава, школы № 1 г. Фаніпаля Дзяржынскага раёна. Дыпломаў трэцяй ступені ўдастоены каманды з Нясвіжскага раёна; гімназіі г. Дзяржынска, сярэдняй школы № 1 г. п. Смілавічы Чэрвеньскага раёна, гімназіі № 1 імя В. А. Караля г. Чэрвеня.
Крыніца: minsk-region.gov.by