242 кватэры. А па сутнасці, столькі ж сем'яў. Усе навасельцы гэтай шматпавярхоўкі - шматдзетныя. І ўжо на стадыі праектавання тут імкнуліся забяспечыць максімальную бяспеку і камфорт у дварах і на вуліцах. Так, да прыкладу, рэалізавана зона без аўтамабіля: пры выхадзе з пад'езда дзіця трапляе не на паркоўку, а на спартыўную пляцоўку. Дарэчы, месцы для гульняў уладкаваныя лепш, чым у якім-небудзь са сталічных двароў. Зрэшты, і аўтамабілістаў не пакрыўдзілі. Дарогу да квартала выканалі з бетону, пакінулі прастору для стаянкі. Не за гарамі, дарэчы, і заканчэнне рэканструкцыі першай чаргі трасы Слабада-Навасады, якая будзе звязваць Смалявічы са сталіцай.
З'явяцца ў мікрараёне школа і дзіцячы сад.
- Школа разлічана на 720 вучняў. Падобныя праекты ўжо ўзводзіліся ў Мінску, у Ляскоўцы, у Барысаве. Там будзе басейн, стадыён, уся інфраструктура адказвае сучасным патрабаванням, - распавёў выконваючы абавязкі дырэктара ўпраўлення капітальнага будаўніцтва Смалявіцкага раёна Мікалай Аляхновіч. - Гэтая школа будзе з паглыбленым вывучэннем замежных моў. Таму частка памяшканняў выдзелена пад лінгафонныя кабінеты. А вось гэты цагляны будынак па суседстве - будучы дзіцячы сад. Тэрыторыя ўсіх аб'ектаў будзе добраўпарадкавана.
Цікавая асаблівасць: з уводам у строй АЭС некаторыя жылыя дамы будуць ацяпляцца электрычнай кацельняй. Будуецца магістральны вадавод. У дамы вада будзе паступаць пасля ачысткі на станцыі абезжалезвання.
- Губернатар даў даручэнне добраўпарадкаваць парк каля возера. Там зараз стыхійныя сцяжынкі, мы збіраемся зрабіць добрыя дарожкі, прывесці ў парадак пляж, абнавіць сцэну, дзе праводзяцца святы. Ужо распрацоўваецца праект, - распавядае дырэктар УКБ Смалявіцкага раёна Андрэй Бартась. - Хацелася б падзякаваць інжынераў і будаўнікоў за працу. Што ні кажы, а ў рэалізацыі такога маштабнага праекта заслуга кожнага з іх. І гэта асабліва варта адзначыць.
Планы ў будаўнікоў грандыёзныя. Акрамя будаўніцтва жылля цяпер разглядаецца магчымасць узвядзення паліклінікі, культурна-асветніцкага і фізкультурна-аздараўленчага цэнтраў. А на месцы гарадской пусткі можа з'явіцца скейт-парк.
- У горадзе ёсць месцы для адпачынку моладзі. Проста іх заўсёды мала. Новая пляцоўка задумваецца як прастора для скейтбордынгу, упэўнена, яе па вартасці ацэняць нашы жыхары, - кажа дырэктар Смалявіцкага гарадскога моладзевага цэнтра Алена Нехаенка.
Мясцовыя ўлады ў перспектыве плануюць распрацаваць праект дэталёвай планіроўкі Смалявічаў, дзе будуць рэалізаваны шматлікія цікавыя ідэі па стварэнні камфортнай гарадской інфраструктуры.
Крыніца: minsk-region.gov.by
