З самай раніцы на рэгістрацыю ў Палац культуры ім. М. Горкага наперавес з касцюмамі і рэквізітам спяшаліся вакалісты і іх групы падтрымкі: музычныя кіраўнікі, сваякі, сябры, удзельнікі падтанцовак. У адборачным туры да ХIX Міжнароднага дзіцячага музычнага конкурсу «ВІЦЕБСК-2021» прынялі ўдзел 12 чалавек ва ўзросце ад 8 да 14 гадоў. Для ўдзелу ў XXX Міжнародным конкурсе выканаўцаў эстраднай песні «ВІЦЕБСК-2021» на праслухоўванне прыехалі 18 вакалістаў ад 18 да 31 года.
- На жаль, эпідэміялагічная сітуацыя ўнесла свае карэктывы: першапачаткова заявак было больш. Тым не менш, радуе, што ў адборы прымае ўдзел 7 выканаўцаў з Барысаўскага раёна. Спадзяемся, што ў іх атрымаецца здзівіць журы, - сказала дырэктар Палаца культуры ім. М. Горкага Ганна Жарыкава.
Ацэньвалі выканаўцаў сапраўдныя прафесіяналы на чале са старшынёй Саюза кампазітараў Рэспублікі Беларусь, членам рэпертуарнай камісіі Міністэрства культуры Рэспублікі Беларусь, членам экспертнай камісіі спецыяльнага фонду Прэзідэнта Рэспублікі Беларусь па падтрымцы таленавітай моладзі, старшынёй цыклавой камісіі "Мастацтва эстрады. Спевы" установы адукацыі «Мінскі дзяржаўны каледж мастацтваў» Аленай Атрашкевіч.
З самага пачатку стала ясна, што асноўная зброя удзельнікаў - іх валоданне голасам, артыстызм і харызма. Члены журы з першых секунд ўважліва слухалі канкурсантаў, назіралі за іх уменнем трымацца на сцэне, рабілі пазнакі. Паўплываў на канчатковы вынік і выбар рэпертуару. Са сцэны гучалі як усім вядомыя хіты, так і малазнаёмыя песні - кожны ўдзельнік выканаў па дзве на рускай, беларускай, англійскай і нават на італьянскай мовах.
Адзін з суддзяў, паэт-песеннік, член саюза пісьменнікаў Рэспублікі Беларусь, лаўрэат нацыянальнай музычнай прэміі «Ліра», кампазітар Алег Жукаў выказаўся пра тое, што ў любы песні вельмі важныя словы. Таму, на яго думку, кампазіцыі на не ўсім зразумелай замежнай мове - загадзя пройгрышны выбар.
У выніку абласны этап на дзіцячы музычны конкурс паспяхова прайшлі Данііл Кульгавы і Уладзіслаў Груздаў (Барысаў), Дзяніс Шыман (Маладзечна), Варвара Бункевіч і Алеся Витолс (Мінскі дзяржаўны каледж мастацтваў).
Лепшымі вакалістамі Міншчыны на конкурс выканаўцаў эстраднай песні на думку журы сталі Карына Ромыш і Камадей Мікіта (Жодзіна), Аляксандра Макольская і Данііл Мышкавец (Мінскі дзяржаўны каледж мастацтваў), а таксама Дар'я Сманцэр (Крупкі). Віншуем і жадаем далейшых поспехаў!
Крыніца: minsk-region.gov.by