"Стаўбцоўшчына ўвайшла ў гісторыю як "родны кут" Якуба Коласа, таму невыпадкова першараднай задачай устаноў культуры раёна стала адраджэнне духоўнага жыцця народа і ўсёй яго нацыянальнай культуры. Гэтых мэт дасягаюць у тым ліку дзякуючы фестывалю "Сымон-музыка", які стаў адной з форм распаўсюджвання народнай інструментальнай музыкі. Яго праводзяць адзін раз у два гады, і зусім хутка ён зноў збярэ ўдзельнікаў - больш за 300 канкурсантаў і амаль 30 творчых калектываў Мінскай і Брэсцкай вобласці", - расказалі ў прэс-службе.
У фестывалі прымуць удзел юныя музыканты самых розных узростаў, якія навучаюцца ў дзіцячых мастацкіх школах і школах мастацтваў, установах адукацыі з музычным ухілам, а таксама інструментальныя калектывы і ансамблі народнага напрамку. Канкурсанты выканаюць творы беларускіх аўтараў, а таксама прадэманструюць аўтарскую апрацоўку народных песень і танцаў ігрой на скрыпцы, цымбалах, гармоніку, акардэоне, баяне, балалайцы, дудцы і іншых музычных інструментах.
Асноўнымі крытэрыямі ацэнкі пры выбары лепшых удзельнікаў стануць выканальніцкае майстэрства, мастацкі ўзровень рэпертуару, сцэнічная культура, захаванне рэгіянальных традыцый у музычных творах, касцюмы. Пераможцы будуць узнагароджаны дыпломамі лаўрэатаў і прызамі.
Першы конкурс "Сымон-музыка" прайшоў у 1989 годзе па ініцыятыве аддзела культуры Стаўбцоўскага райвыканкама. Тады ў мемарыяльную сядзібу музея Якуба Коласа ў Смольні прыехалі больш за 160 выхаванцаў з 17 музычных школ Мінскай вобласці, а другі фестываль прайшоў ужо ў 1990 годзе і сабраў больш за 600 адораных дзяцей не толькі з Міншчыны, але і з іншых рэгіёнаў краіны.
Крыніца: minsk-region.gov.by
