Усяго ў планах прадпрыемстваў цэнтральнага рэгіёна сабраць больш за 300 тысяч тон другога хлеба. Вялікі ўклад унясуць яшчэ і фермеры. Аляксей Кандраценка пабываў ва Уздзенскім раёне і ўбачыў, як на звычайных тарфяніках расце "каралеўскі" ўраджай.
Папулярны ў многіх фермераў Мінскай вобласці сорт бульбы "каралева Ганна" і сёлета не падвёў. На палях гаспадаркі "Алімп-Агра" ён прыносіць 500 цэнтнераў з гектара. Камбайн за дзень выкопвае да 200 тон клубняў, якія затым сартуюць па памеры. Частка ідзе на насенне, частка - на продаж. Свежы ўраджай ужо чакаюць спажыўцы. А гэта школы, бальніцы, магазіны. Плюс, вядома, экспарт.
Фермеры з аграгарадка Дзешчанка ўжо больш за 20 гадоў займаюцца бульбай. Глеба спецыфічная - тарфяная. Яе цяжка апрацоўваць, няпроста і збіраць ураджай (тут пройдзе не кожны камбайн). Перашкодзіць можа і залішняя вільгаць. Таму выкапаць другі хлеб імкнуцца максімальна хутка.
Як летам, так і зараз, у верасні, бульбу збіраюць у пэўны час: з 5 гадзін раніцы да 15:00. Менавіта ў гэты перыяд глеба не паспявае значна прагрэцца і бульбу атрымліваюць халаднаватай.
А па суседстве кампанію "каралеве Ганне" складаюць "дардонь" і "зянон". У морквы і капусты такіх сартоў таксама высокая ўраджайнасць (65-80 тон з аднаго гектара). Агародніну ўбіраюць уручную і фасуюць у сеткі. Тут важны і такі момант, як змена культур на палях.
Аграгарадок Дзешчанка - гістарычна адно з самых бульбяных месцаў Мінскай вобласці. Невыпадкова, што ў мясцовай школе знаходзіцца і адзіны ў нашай краіне тэматычны музей. Школьнікі вывучаюць краязнаўства праз развіццё мясцовай сельскай гаспадаркі і гісторыю другога хлеба.
Яшчэ больш цікавага пра другі хлеб можна будзе даведацца на вялікім "Бульбяным фэсце". Вынікі аграсезона падвядуць навукоўцы, аграрыі, фермеры, кіраўнікі сельгаспрадпрыемстваў і проста аматары страў з бульбы. Месца сустрэчы - аграгарадок Дзешчанка Уздзенскага раёна. Тут жа адкрыюць і памятны знак усенародна любімай культуры.
Крыніца: minsk-region.gov.by
