Зялёных прыгажунь вышынёй ад 0,5 да 1 метра маладзечанцам прапануюць па 15 рублёў (адпускная цана з ПДВ). Столькі ж будуць каштаваць двухмятровыя елкі і хвоі. Дрэўца "ростам" у тры метры абыдзецца ў 20 рублёў, у чатыры - 70. Ну а калі вам раптам захочацца стварыць святочны настрой не толькі ў кватэры, доме, але і ва ўласным двары, або на тэрыторыі офіса, адкладзяце 120 рублёў. Менавіта ў такую суму абыдзецца елка або хвоя вышынёй 6, 7 і 8 метраў. Дзесяціметровая прыгажуня пацягне на 360 рублёў.
Многія наўзамен ёлкі, ссечанай пад самы карэньчык, аддаюць перавагу дрэва навагодняй пароды ў кадцы. Маладзечанскі лясгас улічыў і гэта. Елі і хвоі да 0,5 метра пакупнікам прапануюць па 25 рублёў, метровыя будуць каштаваць 30, паўтараметровыя - 50 рублёў.
Набыць навагоднія дрэвы можна будзе як у лясніцтвах, так і на ёлачных кірмашах.
У Валожыне, напрыклад, яны будуць арганізаваны на вуліцы Партызанскай (аўтамабільная стаянка). Сосны і ёлкі да метра для гараджан і жыхароў раёна будуць каштаваць 14 рублёў (кошт без ПДВ), ад 1 да 2 метраў - 16. Трохметровая прыгажуня абыдзецца ў 20 рублёў, на метр вышэй - 45. 3а лясную госцю вышынёй 8 метраў давядзецца выкласці 300 рублёў, звыш васьмі - 450.
Елкі пышныя, ёлкі зграбней - прадаўцы пастараюцца дагадзіць усім. Набыць галоўны атрыбут навагодніх свят можна да 31 снежня.
Мінскі абласны выканаўчы камітэт
Крыніца: minsk-region.gov.by