У дні фестывалю песні і паэзіі абласны тэатр у Маладзечне пакажа чатыры спектаклі
10 чэрвеня ў 11:00 юных гледачоў чакае музычная казка-жарт па п’есе Сяргея Казлова ў перакладзе Юрыя Куліка “Нельга нам без сябра”. Спектакль, а ісці ён будзе на беларускай мове, раскажа пра Парася, якое спявае. Шкада толькі, што ў вёсцы ніхто ў гэта не верыць. Больш таго, таленавітаму падсвінку пагражае невясёлая перспектыва ператварыцца ў пачастунак да святочнага стала ў гонар яго гаспадыні. Добра, што наш герой зусім не з тых, хто паддаецца злому лёсу! Ён уцякае ў лес, дзе сустракае вернага сябра — Зайца. Разам таварышы перамагаюць злога Ваўка, пераадольваюць перашкоды і пераконваюць усіх прызнаць цудоўны талент Парасяці-спевака!
“Сцеражыся, Леапольд!” — казка-гульня па матывах п’есы Аркадзія Хайта “Дзень нараджэння ката Леапольда”, якую Мінскі абласны драматычны тэатр у Маладзечне пакажа 11 чэрвеня (11:00). Доўжыцца спектакль — гадзіну.
Ну, а дарослага гледача чакаюць спектаклі “Дядюшкин сон” па п’есе Фёдара Дастаеўскага (11 чэрвеня ў 15.00) і гістарычны дэтэктыў, заснаваны на рэальных падзеях, якія адбыліся ў пачатку XVII стагоддзя ў Мінскім ваяводстве, — “Сёстры Дастаеўскія” (10 чэрвеня, у 18:00 г.).
— Заблытанае злачынства расследуе вядомы ў той час земскі суддзя Андрэй Станкевіч, якога называюць беларускім Шэрлакам Холмсам, — анансуе спектакль кіраўнік літаратурна-драматычнай часткі тэатра Таццяна Князева. — За час сваёй кар'еры суддзя заслужыў рэпутацыю прыстойнага, непадкупнага чалавека і выдатнага прафесіянала. У маёнтак ён прыязджае са сваім адданым і правераным сакратаром і памочнікам Феліксам Віславухам. Аднойчы суддзя выратаваў яго ад смяротнага прысуду, за што Віславух пакляўся служыць верай і праўдай свайму ратавальніку. Пад падазрэннем аказваецца ўсё блізкае акружэнне забітага — Казімір, родны сын ад першага шлюбу, удава Марына Карловіч (у дзявоцтве — Дастаеўская), яе родная сястра Раіна Дастаеўская, кіраўнік маёнтка… Глядач стане сведкам мноства цікавых сюжэтных паваротаў і паспрабуе адгадаць: хто ён, гэты выкрутлівы злачынец?
Спектакль ідзе на беларускай мове, працягласць — 2 гадзіны 15 хвілін.
Крыніца: minsk-region.gov.by
