Кожная зала - асобная эпоха ў жыцці Слуцкага краю. Сярод унікальных экспанатаў арыгінал слуцкага пояса, касцяныя шахматы XII стагоддзя, новыя сведчанні аб заснаванні горада і нямала касмічных сюрпрызаў.
Слуцкія паясы, Анастасія Слуцкая, Сафія Слуцкая, слуцкая бэра і старэйшая школа Беларусі. Усе брэнды горада з тысячагадовай гісторыяй прадэманстраваны тут, у адноўленым краязнаўчым музеі горада Слуцка.
Да гістарычных помнікаў гэтага краю адносіцца і Слуцкае евангелле (унікальны рукапісны помнік), і Слуцкая мануфактура (калісьці вядомая на ўвесь свет). А выпускнікі Слуцкай гімназіі № 1, якая была зацверджана яшчэ граматай Януша Радзівіла ў далёкім 1617 годзе, таксама слава і гонар сваёй зямлі.
Эпохі і асобы, князі і купцы, прадстаўнікі дзевяці рэлігійных канфесій, вучоныя, медыкі, мастакі, пісьменнікі, спартсмены і касманаўты. Над стварэннем новай экспазіцыі каманда спецыялістаў (гісторыкі-краязнаўцы, музейныя работнікі, мастакі і дызайнеры) працавала не адзін год. За гэты перыяд фонды значна папоўніліся рэдкімі экспанатамі. Зараз іх у музейнай скарбонцы больш за 35 тысяч.
Сярод новых экспанатаў музея старажытныя дакументы - копія фрагмента "Пячэрскага пацерыка", дзе згадваецца зусім іншая дата заснавання горада - больш чым на сто гадоў раней.
Невыпадкова ў краязнаўчым музеі з'явілася і зала касманаўтыкі. Значная частка ўраджэнцаў Слуцкага краю - ветэраны Байканура, канструктары авіяцыйнай і ракетнай тэхнікі. Новае экспазіцыйнае афармленне распавядае пра касмічны сучасны горад.
Адноўлены будынак краязнаўчага музея, якому сёлета 70, адзін з падарункаў гораду. Новы статус абавязвае. Слуцк падхопіць эстафету ад Оршы і стане культурнай сталіцай Беларусі - 2023.
Крыніца: minsk-region.gov.by
