"БЕЛАЗ зведаў на сабе, што такое санкцыйны націск. У адзін момант прадпрыемству сталі недаступны больш за 1,5 тыс. камплектуючых, у тым ліку важнейшая сістэма кар'ернага самазвала - рухавік. Але завод не спыніў работу ні на дзень. Больш таго, нам не толькі ўдалося захаваць усю лінейку серыйнай прадукцыі, але і актыўна прадоўжыць рэалізацыю інавацыйных праектаў. Шмат у чым гэта стала магчымым дзякуючы эфектыўнаму супрацоўніцтву з кампаніямі з Расійскай Федэрацыі, якое ў існуючай сітуацыі стала толькі ўмацоўвацца і развівацца", - сказаў Сяргей Нікіфаровіч.
Паводле яго слоў, сёння ў кожным сегменце грузападымальнасці БЕЛАЗ можа прапанаваць абсалютна імпартазамешчаны прадукт. "Нашы спажыўцы могуць не толькі выбраць аптымальнае рашэнне па камплектацыі самазвала, але і своечасова праводзіць сэрвіснае абслугоўванне тэхнікі на працягу ўсяго яе жыццёвага цыкла", - адзначыў ён.
Фінальны этап завадскіх выпрабаванняў пачаў 90-тонны газатурбінны самазвал з маторам, вырабленым расійскай кампаніяй "Калужскі рухавік". Пасля заканчэння завадскіх выпрабаванняў самазвал пачне эксплуатацыйныя выпрабаванні ў рэальным кар'еры. У адным з самых запатрабаваных у спажыўцоў класе грузападымальнасці 130 т, дзе БЕЛАЗ займае 70 працэнтаў сусветнага рынку, перспектыўнай распрацоўкай з'яўляецца кар'ерны самазвал з гібрыднай схемай работы. БЕЛАЗ-7513М - свабодны ад імпарту прадукт Саюзнай дзяржавы Беларусі і Расіі.
"У сегменце грузападымальнасці 220 т сумесна з партнёрамі з Расіі рэалізуем праект па стварэнні самазвала з рухавіком Каломенскага завода. На гэты праект мы ўскладаем вялікія надзеі: БЕЛАЗ-75304 створаны пры ўдзеле лепшых спецыялістаў Беларусі і Расіі. Самазвал цяпер праходзіць завадскія выпрабаванні. У другім квартале гэтага года ён пачне эксплуатацыйныя выпрабаванні ўжо ў рэальным кар'еры", - дадаў гендырэктар.
"Стварэнне тэхнікі на альтэрнатыўных відах паліва, паглыбленне кааперацыі з партнёрамі з Расіі і рэалізацыя палітыкі імпартазамяшчэння дазваляе нам ва ўмовах санкцыйнага націску валодаць неабходнымі тэхналагічнымі кампетэнцыямі, суверэнітэтам і ўстойлівасцю", - падкрэсліў Сяргей Нікіфаровіч.
ААТ "БЕЛАЗ" - кіруючая кампанія холдынга "БЕЛАЗ-Холдынг" - буйнейшы сусветны вытворца кар'ерных самазвалаў і транспартнага абсталявання для горназдабыўной і будаўнічай прамысловасці. Займае каля 30 працэнтаў сусветнага рынку кар'ерных самазвалаў асабліва вялікай грузападымальнасці. Вырабляе самы буйны ў свеце кар'ерны самазвал грузападымальнасцю 450 т.
Крыніца: minsk-region.gov.by