Праца юнай мастачкі з Капыля Арыны Зварыка не толькі
заваявала III месца па выніках нацыянальнага адбору Міжнароднага конкурсу
дзіцячага малюнка FAI Young Artists Contest 2019, але і ўжо адправілася ў
Лазану (Швейцарыя) для працягу свайго конкурснага шляху.
Дзевяцігадовая Арына разам з педагогам-арганізатарам з
гімназіі № 1 г. Капыля Святланай Генадзьеўнай Зуевай падрыхтавала малюнак пад
назвай "Калі-небудзь я таксама палячу..." для ўдзелу ў малодшай
узроставай катэгорыі. Дзяўчынцы падабаюцца самалёты і ўсё, што звязана з імі.
Яна марыць стаць сцюардэсай, таму з задавальненнем прыняла ўдзел у конкурсе.
Усяго было адабрана 9 рабят, працы якіх перамаглі і занялі
прызавыя месцы ў нацыянальным адборы. Пераможцы атрымалі сертыфікаты на палёт
на верталёце, медалі і дыпломы. Акрамя таго, усе 45 фіналістаў нацыянальнага
адбору атрымалі прыемныя сувеніры ад Беларускай федэрацыі авіяцыйнага спорту.
Дзіяна Ткачэнка