Капыльскі раённы выканаўчы камітэт

Пустуючыя пляцоўкі і непрывабныя зялёныя зоны акультурваюцца, ператвараючыся ў эфектныя карціны, пры поглядзе на якія, як той казаў, і вочы радуюцца, і душа адпачывае.
Вясёлы рознакаляровы паравозік з'явіўся ў скверы ў пойме рэчкі Каменкі
На вуліцах райцэнтра з'яўляюцца і кампактныя дэкаратыўныя элементы, і маштабныя збудаванні. Да прыкладу, уздоўж праезнай часткі па вул.Партызанскай былі ўсталяваныя вертыкальныя стойкі, увянчаныя кашпо з кветкамі (на першым здымку). Як патлумачыла начальнік аддзела ЖКГ, архітэктуры і будаўніцтва Капыльскага райвыканкама Марына Канончык, важкі ўклад у справу ўвасаблення ідэі стварэння такога незвычайнага «калідора» ўнёс дырэктар «КолмаксСтрой» Мікалай Няверка. Ён падаў у бязвыплатнае карыстанне матэрыял на суму каля 3000 рублёў, з якога работнікамі КУП «Капыльская ЖКГ» і была выраблена арыгінальная канструкцыя. На металічныя падстаўкі камунальнікамі пасля было ўстаноўлена каля 300 гаршкоў з высаджанымі ў іх рознакаляровымі петуніямі.
Упрыгожылі горад і некалькі дзясяткаў аб'ёмных драўляных кашпо, куды на цёплы перыяд «пасяліліся» саджанцы розных дэкаратыўна квітнеючых раслін.
Працягваюць з'яўляцца ў райцэнтры і цікавыя аб'екты для маленькіх гараджан. У скверы, размешчаным ля поймы ракі Каменкі, нядаўна «выраслі» дашчаныя дрэвы, афарбаваныя ў розныя адценні зялёнага колеру. Туды ж «заехаў» і новы транспарт - зараз з аўтамабілямі жыхароў бліжэйшых дамоў суседнічае яркі драўляны паравозік з вагончыкамі-кветнікамі. Новы «транспартны сродак» адразу ж аблюбавалі бацькі з дзецьмі - добраўпарадкаваная пляцоўка ўжо паспела набыць статус фотазоны. Малыя з задавальненнем пазіруюць перад фотакамерамі, зручна уладкоўваючыся ў кабіне маляўнічай тэхнікі.
Дарэчы, курыруе падобныя праекты інжынер па добраўпарадкаванні КУП «Капыльская ЖКГ» Кацярына Курылік. Менавіта пад яе кіраўніцтвам камунальнікі і ствараюць Капылю яго «твар».
Нараўне з распрацоўкай і рэалізацыяй новых праектаў па добраўпарадкаванні ў райцэнтры вядзецца разнапланавая дзейнасць па падтрыманні парадку ў цэлым. У прыватнасці, на дадзеным этапе актуальныя працы па скошванне травы і кладкі тратуарнай пліткі на асобных участках вуліц горада. Словам, спецыялісты і работнікі зацікаўленых службаў прыкладаюць нямала сіл, працы і фінансавых сродкаў для таго, каб жыхары і госці Капыля мелі магчымасць прайсціся па сучасных, дагледжаных, цікава аформленых вуліцах, а не бачыць маркотныя карціны закінутай правінцыі.
Аднак знаходзяцца людзі, якія па-варварску ставяцца да таго, што радуе большасць: крадуць альбо ламаюць высаджаныя расліны, кветачніцы, агароджы. Часцяком правапарушальнікі нават не падазраюць, што робяць гэта пад прыцэлам устаноўленых непадалёк камер відэаназірання. А за такія дзеянні заканадаўствам прадугледжана сур'ёзная адказнасць. Так, згодна з арт. 10.5, 10.9 і 17.1 КоАП Рэспублікі Беларусь падобныя правапарушэнні расцэньваюцца як дробны крадзеж, наўмысныя знішчэнне альбо пашкоджанне маёмасці або дробнае хуліганства і цягнуць за сабой (у залежнасці ад артыкула) накладанне штрафу ў памеры ад двух да пяцідзесяці базавых велічынь, прадугледжана і пакаранне ў выглядзе адміністрацыйнага арышту. У асобных выпадках — у залежнасці ад мэтаў зламысніка і памераў нанесенай шкоды - сітуацыя можа апынуцца больш жаласнай і дайсці і да крымінальнай адказнасці.
Справа за малым: зрабіць выбар - альбо атрымліваць асалоду ад прыгажосці, альбо расплачвацца за псаванне як гэтай прыгажосці, так і настроі людзей, неабыякавых да падзей, якія адбываюцца ў горадзе.
Аксана Міхайлоўская