Праграмай святкавання Дня горада было прадугледжана маса культурных і забаўляльных мерапрыемстваў для дарослых і дзяцей, аднак знайшліся і тыя, хто ў святочны дзень вырашыў аддаць свой час спорту.
Напрыклад, у дзесяць гадзін раніцы на гарадскім пляжы адбылося спаборніцтва па пляжным валейболе. У спартыўным спаборніцтве адважыліся праверыць сваё майстэрства і ўзровень валодання мячом ўдзельнікі шасці каманд: «Смелыя хлопцы», «Газавік», «ЖКГ», «Усава», «Пацейка СШ», «Бывалыя». Гулялі два на два. Знясільваючая двухгадзінная валейбольная сесія не зашкодзіла гульцам скончыць сяброўскі паядынак у добрым настроі. Па выніках спаборніцтва першае месца заваявалі Ігар Дарошка і Валерый Святлоў з каманды «Смелыя хлопцы». Другое месца належыць прадстаўнікам каманды «Пацейка СШ» Анатолю Водапьянаву і Уладзіміру Лукашэвічу. Трэцяе месца занялі «Бывалыя» Дзяніс Буракоў і Яўген Дарашэвіч.
Для аматараў вулічных відаў спорту быў арганізаваны турнір па стрытболе, які адбыўся толькі дзякуючы стойкім і адказным хлопцам з каманд «Гімназісты» і «1МВ». Дзесяціхвілінная гульня завяршылася з лікам 10: 8 на карысць каманды «Гімназісты». Хлопцы, якія занялі першае месца, Улад Кіневіч, Андрэй Лабко і Данііл Курыльчык, атрымалі ад прадстаўніка БРСМ сертыфікат на суму трыццаць пяць рублёў на наведванне пельменяў «ЛепімСамі».
Вера Васілеўская,
пазаштатны карэспандэнт