На працягу амаль 30 гадоў Зінаіда Вячаславаўна даглядае за домам у вёсцы Аксаміты, дзе нарадзілася. На яе думку, асаблівую праблему для вёскі, як і для суседніх (Яўсеевічы, Балгавічы, Рыматаўшчына), ствараюць пустуючыя ўчасткі, якія не належаць людзям. І тут узнікае праблема абкошвання і далейшага вырашэння іх лёсу. Падчас прыёму жанчына прапанавала некалькі варыянтаў вырашэння праблемы. Яна разлічвае, што зацікаўленыя структуры прадумаюць мерапрыемствы па навядзенні парадку ў сельскіх населеных пунктах, і ў іх будзе менш кляшчоў, асоту і іншага пустазелля, знікне сухая трава, якая пагражае пажарнай бяспецы. Таксама заяўнік спадзяецца, што будуць прыняты меры для стварэння філіяла сельскай жыллёва-камунальнай гаспадаркі, дзе б жыхары вёсак за грошы маглі атрымаць запатрабаваныя паслугі. Акрамя гэтага жанчына падняла і іншыя пытанні: добраўпарадкаванне дарог да помніка расстраляным яўрэям і да в. Аксаміты, а таксама інфармаванне насельніцтва аб аказваемых платных паслугах КУП «Капыльская ЖКГ».
А вось капылянка Ларыса Нікалаева агучыла наступныя праблемы. Пачала з нездавальняючай (на яе думку) працы Капыльскага райспажыўтаварыства, адкрыцця кнігарні і літаратурнага кафэ ў горадзе, аптэчнага кіёска ў краме «Родны кут» (у народзе завецца «Пралеска»), устаноўкі поручняў на ганку раённай бібліятэкі і закончыла будаўніцтвам дзіцячай бібліятэкі, якое зацягнулася. Усе пытанні заяўніка ўзяты на кантроль і пасля дэталёвага вывучэння кожнага дадуцца грунтоўныя адказы.
На пытанне павелічэння колькасці матэрыялаў на беларускай мове на старонках «Слава працы» паведамляем, што ў адпаведнасці з Канстытуцыяй Рэспублікі Беларусь дзяржаўнымі мовамі Рэспублікі Беларусь з’яўляюцца беларуская і руская. Згодна з пасведчаннем Міністэрства інфармацыі Рэспублікі Беларусь аб рэгістрацыі сродку масавай інфармацыі раённая газета «Слава працы» выдаецца на беларускай і рускай мовах. Перыядычна на беларускай мове выходзяць такія спецпраекты, як «Мова матчына — наша спадчына», «АРТ-праспект», «Сямейны альбом», «Страчаная спадчына», па-беларуску пераважна расказваецца пра гісторыю роднага краю, народных і таленавітых умельцаў і г.д. Улічваючы пажаданні чытачоў, рэдакцыя плануе павялічыць колькасць матэрыялаў на беларускай мове.
Шматдзетная сям’я па пытаннях будаўніцтва склепа і рамонту дома прыехала з в. Бабоўня. Было даручана камісійна правесці абследаванне дома, у якім пражывае заяўнік, на прадмет адпаведнасці ўстаноўленым санітарным і тэхнічным патрабаванням. А вось у іншым выпадку вырашэнне пытання наконт прыватызацыі дома аказалася не ў кампетэнцыі кіраўніка раёна, аднак заяўнікам параілі, куды звярнуцца.
Таццяна БОХАН
«СП» http://www.kopyl.by
