Адбылося першае рабочае пасяджэнне абноўленага складу Маладзёжнага парламента, створанага пры раённым Савеце дэпутатаў.
Маладыя парламентарыі падчас пасяджэння
У Капыльскім раёне Маладзёжны парламент пры раённым Савеце дэпутатаў упершыню быў абраны ў снежні 2017 года ў складзе 21 дэпутата. За гэты перыяд адбыліся тры скліканні, і кожны склад юных парламентарыяў уносіць у яго працу новыя ідэі і прапановы. Па словах старшыні раённага Савета дэпутатаў Ірыны Кісляк, сёння Маладзёжны парламент складаецца з 19 дэпутатаў, з іх 12 - гэта пачаткоўцы. Яны — прызнаныя лідэры, актывісты і выдатнікі вучобы. Менавіта гэтыя юнакі і дзяўчаты набралі больш за ўсё галасоў пры выбарах у парламент у сваіх установах адукацыі.
- Маладзёжны парламент функцыянуе з мэтай папулярызацыі сярод моладзі сістэмы мясцовага кіравання і самакіравання, выяўлення лідараў сярод маладзёжнага руху, — адзначыла ва ўступным слове першы сакратар РК ГА «БРСМ» Анастасія Козел. - Юныя парламентарыі Капыльшчыны паспяхова рэалізуюць сябе ў сацыяльна значных справах, прымаюць актыўны ўдзел у арганізацыі і правядзенні раённых і абласных мерапрыемстваў.
Урачыстым момантам сустрэчы стала ўручэнне старшынёй райвыканкама Сяргеем Пілішчыкам новым выбраннікам пасведчанняў. Шляхам адкрытага галасавання выбралі і старшыню, якім зноў стала навучэнка гімназіі № 1 г.Капыля ім. Н. В. Рамашко Анастасія Карповіч.
Пасведчанне парламентару Алёне Астроўскай уручае Сяргей Пiлiшчык
Затым у фармаце адкрытага дыялогу адбылося абмеркаванне асноўнага пытання, вынесенага на парадак дня рабочага пасяджэння, - якія пераўтварэнні трэба правесці ў раёне, каб зрабіць лепш не толькі сваё жыццё, але і жыццё сваіх родных, сяброў і навакольных. У зацікаўленым абмеркаванні таксама прынялі ўдзел намеснік старшыні райвыканкама Аляксандр Дубіна і начальнік упраўлення па адукацыі, спорту і турызму райвыканкама Ірына Абас. Па выніках сустрэчы парламентарыям раздалі «хатняе заданне»: падумаць над новымі ініцыятывамі развіцця Капыльшчыны. На чарговым пасяджэнні агучаныя ідэі і прапановы маладых парламентарыяў возьмуць на заметку, пасля іх старанна разгледзяць і, цалкам магчыма, унясуць у асноўны план працы.
Сваімі ўражаннямі аб дзейнасці Маладзёжнага парламента і планамі на будучыню падзяліліся юныя парламентарыі.
Лідэр маладзёжнага парламента Анастасія Карповіч:
- Абранне мяне як старшыні было чаканым. Лічу, што гэта адказная пасада, і я буду яшчэ больш працаваць, чым у мінулыя гады, каб паказаць сябе з лепшага боку. За час працы Маладзёжнага парламента з'явіліся ідэі па стварэнні парку адпачынку дзяцей і моладзі каля зоны адпачынку. Сёння ў нас ёсць гатовыя прэзентацыі па іх рэалізацыі. Спадзяюся, што раённыя ўлады падтрымаюць нас, і з іх дапамогай дадзены праект зможам ўвасобіць у рэальнасць.
Навучэнка гімназіі № 1 г. Капыля ім. М.В. Рамашко Ганна Матусевіч:
- Я ўпершыню абраная ў Маладзёжны парламент. Мы будзем разглядаць розныя варыянты вольнага часу для дзяцей і падлеткаў, таму што гэта неабходна, інакш усе будуць расчароўвацца ў нашым горадзе. А нам гэтага не трэба, таму што ў Капыля ёсць гісторыя, гэта наша радзіма, і мы будзем прымаць усе магчымыя меры, каб ён развіваўся і станавіўся больш прыгожым.
Навучэнка Семяжаўскага КПК дзіцячы сад-сярэдняя школа Вікторыя Козел:
- Дэпутатам маладзёжнага парламента з'яўляюся з самага яго заснавання. Я жыву ў выдатным аграгарадку Семежава, дзе ёсць цудоўны цэнтр культуры і вольнага часу. Дык вось, дзякуючы маладзёжнай ініцыятыве ў ім зрабілі ацяпленне, цяпер камфортна стала ўсім наведвальнікам. А яшчэ хочацца неяк ажывіць не толькі горад, але і свой аграгарадок таксама. Добрым месцам вольнага часу моладзі можа стаць цэнтральная частка аграгарадка. Там ёсць добры парк, ён невялікі, але ўсё ж, калі там паставіць новую альтанку, а яшчэ перадуглядзець музычнае суправаджэнне, гэта будзе выдатна.
Таццяна БОХАН
«СП» http://www.kopyl.by
