З узнагародамі ўдзельнікі конкурсу «Твой шанец»: Канстанцін Шыманскі, Вікторыя Жогаль, Вікторыя Трухан, Ксенія Грыцэвіч, Анастасія Душэўская і Мілана Іванова
III адкрыты фестываль-конкурс мастацтваў «Залатая нота», які прайшоў у Мінскім гарадскім Палацы культуры, парадаваў высокімі дасягненнямі. Дыпломам лаўрэата I ступені ўзнагароджаны ансамбль «Кліо», а ў сольным выкананні самыя высокія ўзнагароды конкурсу, дыпломы лаўрэатаў I ступені, заваявалі Вікторыя Жогаль, Вікторыя Трухан і Канстанцін Шыманскі. Дыпломамі лаўрэатаў II ступені ўзнагароджаны Паліна Саладуха і Анастасія Бачко. Дыпламантам I ступені стала Мілана Іванова.
Выхаванцы студыі прынялі ўдзел у XIX міжнародным конкурсе-фестывалі музычна-мастацкай творчасці «Славянскія сустрэчы». На свята творчасці прыехалі юныя таленты з Беларусі, Расіі, Казахстана і Латвіі. Фестываль арганізаваны творчым аб'яднаннем «Трыумф» - членам CID UNESCO - і адбыўся пры падтрымцы Парыжскай рускай кансерваторыі ім. Сяргея Рахманінава і Міжнароднай Акадэміі музыкі Алены Абразцовай. Юныя таленты Капыльшчыны вярнуліся з перамогамі! Дыплом лаўрэата і ступені заваявалі Паліна Саладуха і Вікторыя Жогаль. Дыплом лаўрэата ІІ ступені - Вікторыя Трухан, дыплом лаўрэата ІІІ ступені - Анастасія Бочка.
На V Міжнародным фестывалі-конкурсе «Творчасць без межаў» прадэманстравала свой талент у народным вакале Анастасія Бачко. Вынік - дыплом лаўрэата ІІ ступені.
У скарбонцы ўзнагарод і дыпломы з II Міжнароднага конкурсу маладых выканаўцаў «Твой шанец». Атрымаць запаветны вышэйшы бал было няпроста, у кожнай узроставай катэгорыі - нямала ўдзельнікаў, якія з'ехаліся з розных куткоў Беларусі і не толькі. Прафесійнае журы, членамі якога з'яўляліся спявачка Анастасія Ціхановіч і беларускі кампазітар, аранжыроўшчык, прадзюсар Максім Алейнікаў, па вартасці ацаніла галасы і манеру выканання капылян. У выніку дыплом лаўрэата I ступені ў сольным выкананні заваявалі Вікторыя Жогаль і Вікторыя Трухан. Дыплом лаўрэата ІІ ступені - Паліна Саладуха. Лаўрэатам ІІІ ступені стаў ансамбль узорнай студыі эстраднага вакалу «Кліо» ў складзе Вікторыі Жогаль, Анастасіі Душэўскай, Міланы Івановай, Вікторыі Трухан, Канстанціна Шыманскага і Ксеніі Грыцэвіч.
Салістка студыі Ірына Драцкая прыняла ўдзел у абласным этапе фестывалю мастацкай творчасці сярод органаў і падраздзяленняў па надзвычайных сітуацыях установы «Мінскае абласное ўпраўленне МНС», прысвечанага Году малой радзімы і 20-годдзю МНС.
Ірына прадставіла патрыятычны і эстрадны конкурсныя нумары і ў дзвюх намінацыях заваявала дыпломы лаўрэата і ступені. І зараз прадставіць Мінскую вобласць на рэспубліканскім этапе фестывалю.
Цікавы, карысны і вельмі пазітыўны вопыт - здымкі ў кліпе. Салісты студыі Вікторыя Жогаль і Вікторыя Трухан працавалі на адной пляцоўцы разам з музыкамі з «NaviBand». Менавіта гэтая папулярная беларуская група прадстаўляла нашу краіну на конкурсе песні «Еўрабачанне» ў 2017 годзе. Анкета, кастынг, паездка ў сталіцу, здымачная пляцоўка — для дзяўчынак гэта ўпершыню, таму ўсё было вельмі цікава, незвычайна і незабыўна. І, як заўсёды, запалілі ў духу «Кліо». А здымалі кліп да новага сінгла гурта «NaviBand» «Адзін з нас».
Крысціна ЖОГАЛЬ
«СП» http://www.kopyl.by
