Выдатна, калі з Новым годам віншуе сам Дзед Мароз! А калі яшчэ не адзін? Тады верагоднасць выканання задуманага ўзрастае ў шмат разоў. Пачуць віншаванні адразу ад некалькіх дзясяткаў Дзядоў Марозаў капыляне і госці горада змаглі падчас урачыстага шэсця. Дзяды Марозы і Снягуркі, казачныя персанажы і чароўныя героі прайшлі па цэнтральнай плошчы нашага горада. Кожная арганізацыя і прадпрыемства раёна падрыхтавалі свае віншаванні ў вершах, песнях і нават з танцамі. Настрой сабраўшыхся гасцей і ўдзельнікаў свята ўздымалі вясёлыя навагоднія мелодыі. Віншаванне з Новым годам прагучала ад старшыні райвыканкама Сяргей Пілішчыка, які пажадаў жыхарам раёна дабра, дабрабыту і дастатку. Гучалі віншаванні не толькі ад зімовых чараўнікоў, але і ад галоўнага Дзеда Мароза і яго памагатых - сняжынак, чые ролі з годнасцю выканалі старшыня Пацейкаўскага сельвыканкама Сяргей Цвірка, вучаніца СШ № 2 г. Капыля ім. Т. Гартнага Ульяна Дубовік і гімназістка Анастасія Карповіч. Завяршэннем свята стаў традыцыйны навагодні карагод па плошчы горада.
Дзіяна Ткачэнка «СП» http://www.kopyl.by
