У маляўнічым навагоднім мерапрыемстве прынялі ўдзел 400 чалавек, якія прыехалі з усіх куткоў Мінскай вобласці. Сярод юных жыхароў сталічнага рэгіёна, якія дабіліся перамог у вучэбнай, спартыўнай, творчай і грамадскай дзейнасці, і іх бацькоў, якія вызначыліся на працоўнай ніве, - прадстаўнікі нашага раёна. У скарбонцы мам, тат і дзяцей – узнагароды самых розных узроўняў. Так, у свяце прымалі ўдзел ляснічы Бабаўнянскага лясніцтва Сяргей Мікалаеўскі, чыя бездакорная працоўная дзейнасць адзначана падзякай старшыні Мінаблвыканкама. Вартая бацькі і яго дачка, шасцікласніца з Лясноўскай СШ Мілана - прызёр абласнога і раённага конкурсу работ даследчага характару.
Узнагародай за высокія дасягненні настаўнікі СШ № 2 г. Капыля ім. Т. Гартнага Святланы Сапешка з'яўляецца Падзяку начальніка галоўнага ўпраўлення па адукацыі Мінаблвыканкама. Не адстае ад мамы і дачка Марыя, якая за 10 гадоў навучання ў паказанай установе адукацыі дасягнула высокіх вынікаў у абласным і раённым конкурсах работ даследчага характару.
Узнагародамі адзначана і працоўная дзейнасць педагога дадатковай адукацыі Цэнтра творчасці дзяцей і моладзі Капыльскага раёна Ірыны Дуброўскай, дачка якой Марыя з'яўляецца пераможцам абласных творчых конкурсаў «Калядная зорка» і «Добры дзень, свет!».
Маюць знакі адрознення камандзір аддзялення ПАСП № 15 в. Слабада-Кучынка Сяргей Драніч і старшы інспектар групы інфармацыйнага забеспячэння РАУС Ігар Ліпніцкі. Пад стаць бацькам і іх дзеці: Мілана Драніч заняла 1-е месца ў камандным заліку падчас правядзення Алімпійскіх дзён моладзі Мінскай вобласці па біятлоне, а Ілья Ліпніцкі – пераможца камандных спаборніцтваў па футболе.
Ганаровай граматы Галоўнага ўпраўлення ідэалагічнай работы, культуры і па справах моладзі Мінаблвыканкама у 2019 годзе былі ўдастоены галоўны спецыяліст аддзела ідэалагічнай работы, культуры і па справах моладзі райвыканкама Таццяна Віяленцій, старшы навуковы супрацоўнік раённага краязнаўчага музея Андрэй Лятчэня і метадыст РЦК Людміла Давідоўская. Іх сыны, нягледзячы на юны ўзрост, таксама могуць ганарыцца сваімі поспехамі. Шасцікласнік СШ № 2 г. Капыля Захар Ярэц – актыўны сябра Беларускай піянерскай арганізацыі, вучань 8 класа гімназіі № 1 г. Капыля ім. Н. В. Рамашка Максім Лятчэня - пераможца Інтэрнэт-алімпіяд па розных прадметах, а пяцікласнік СШ № 2 г.Капыля Ігнат Гаўрык актыўна займаецца ў Капыльскай ДШМ. Дэлегацыю Капыльшчыны ўзначаліла начальнік упраўлення па адукацыі, спорце і турызме райвыканкама Ірына Абас.
Віншуючы ўдзельнікаў акцыі з навагоднімі і каляднымі святамі, намеснік старшыні Мінаблвыканкама Іван Маркевіч адзначыў: «Мэта сённяшняй акцыі - аб'яднаць навучэнцаў-лідараў і іх бацькоў-перадавікоў у адзіную сям'ю, адзначыць і падтрымаць іх дасягненні, падзякаваць за сумесную працу, дзякуючы якой Міншчына і наша краіна жывуць сёння годна!»
А яшчэ ў гэты цудоўны зімовы дзень адбыўся выбар лепшых Дзеда Мароза і Снягуркі, якія прыехалі з усіх раёнаў Мінскай вобласці і горада Жодзіна. Прынялі ўдзел у творчым спаборніцтве і капыльскія «чараўнікі». У ролі Дзеда Мароза выступіў настаўнік Каменскага ВПК д/с – СШ Сяргей Новік, а Снягуркай стала метадыст упраўлення адукацыі, спорту і турызму райвыканкама Ірына Лазоўская. Нікога не пакінулі абыякавымі жарты, гульні, песні, танцы, казачнае прадстаўленне «Навагодняя размарозка», а самае галоўнае – сапраўднае цыркавое шоу.
- Усе мы, і дзеці, і дарослыя, атрымалі неверагодны зарад бадзёрасці, весялосці, - распавядае Марыя Сапешка. - Мы змаглі цёпла пагутарыць адзін з адным, са сваімі аднагодкамі з іншых раёнаў. На такім свяце адчуваеш гонар не толькі за свае дасягненні, але і за высокія вынікі сваіх бацькоў. Не памылюся, калі скажу, што ўсе, хто ўзяў удзел, пажадалі, каб такая акцыя стала добрай традыцыяй Міншчыны.
Дзіяна Ткачэнка
«СП» http://www.kopyl.by
