... Ва ўзросце 12 гадоў юны жыхар Капыля Дзіма Равенскі граў больш чым на 10 інструментах: гармоніку, баяне, акардэоне, барабане, бубне, трамбоне, саксафоне, кларнеце, гітары, дудцы, акарыне, жалейцы. А як жа інакш: усе родзічы хлопчыка і па бацьку, і па маці былі музыкамі-аматарамі, гралі на слых, без нот. Разам з бацькам Дзмітрый паспяхова выступаў у мясцовым і вельмі папулярным, тады яшчэ першым, самадзейным ансамблі «Капыльскія дудары». Таленавіты хлопец у Капылі паспяхова скончыў музычную школу па класе баяна і працаваў у мясцовым доме культуры, дзе ўзначальваў эстрадны ансамбль. Затым - рабочы, служба ў войску, музвучылішча, Інстытут культуры і, нарэшце, атрымаў працоўнае месца ў сталічнай гімназіі № 14, дзе і з'явілася ідэя стварыць дзіцячы фальклорны ансамбль, які ў савецкія часы называлі адзіным у краіне калектывам, які грае сапраўдную народную музыку.
«Дударыкі» аб'ехалі з гастролямі больш за сорак краін - ад Партугаліі да Тайваня. Сам жа Дзмітрый Равенскі «Мінчанін года-2010», уладальнік васьмі міжнародных узнагарод, у тым ліку памятнага нагруднага знака «За мужнасць і любоў да Айчыны» Міжнароднага фонду маршала Г. К. Жукава і медаля »За прапаганду народнай культуры ў Еўропе». Адзначаны дыпломам Прадстаўніцтва ААН у Рэспубліцы Беларусь за вялікі асабісты ўклад у захаванне і развіццё беларускіх нацыянальных традыцый. Яму таксама прысвоена званне народнага музыканта зямлі рускай, ён часты госць і на капыльскай зямлі. Сёлета «Дударыкі» адзначаюць свой 50-гадовы юбілей. Важна тое, што за час свайго існавання ансамбль не адарваўся ад народных каранёў, а па-ранейшаму захоўвае і пашырае традыцыйную беларускую музычную культуру.
Таццяна БОХАН
Фота Крысціны ЖОГАЛЬ
«СП» http://www.kopyl.by