■ Аляксандр Пякарскі (злева) з удзельнікамі пасяджэння
У рабоце пасяджэння прыняў удзел (цяпер ужо былы. – Аўт.) міністр абароны Рэспублікі Беларусь генерал-лейтэнант Андрэй Раўкоў, прадстаўнікі абласных і раённых арганізацый БСА, ДТСААФ, члены ветэранскіх і іншых грамадскіх арганізацый краіны. Кіраўнік абароннага ведамства азнаёміў афіцэраў запасу і ў адстаўцы з мерамі, якія прымаюцца ў Беларусі па арганізацыі ваеннай бяспекі, а таксама з актуальнымі пытаннямі будаўніцтва і развіцця Узброеных Сіл нашай краіны.
Андрэй Раўкоў падкрэсліў, што Беларускі саюз афіцэраў сёння ўносіць значны ўклад у падтрыманне стабільных адносін у грамадстве, у патрыятычнае выхаванне моладзі. Андрэй Аляксеевіч выказаў цвёрдую ўпэўненасць у тым, што БСА і надалей будзе цвёрда стаяць на абароне дзяржаўных інтарэсаў Рэспублікі Беларусь. Ішла размова пра ўвядзенне ва ўстановах сярэдняй адукацыі пасады кіраўніка па ваенна-патрыятычным выхаванні моладзі.
Старшыня рэспубліканскага Савета БСА генерал-маёр запасу Сяргей Бобрыкаў далажыў сходу аб выніках дзейнасці грамадскага аб’яднання ў 2019 годзе і вызначыў асноўныя напрамкі дзейнасці Беларускага саюза афіцэраў у 2020 годзе.
Сяргей Валянцінавіч у сваім выступленні падкрэсліў, што прыярытэтнае месца ў дзейнасці саюза па-ранейшаму павінна займаць задача згуртавання афіцэрскай грамадскасці ў мэтах забеспячэння максімальнай кансалідацыі ўсіх патрыятычных сіл для захавання і падтрымання стабільнасці ў грамадстве і дзяржаве. Актывістамі праведзена значная работа па ваенна-патрыятычным выхаванні моладзі, прапагандзе баявых традыцый і гераічных подзвігаў старэйшага пакалення. БСА быў ініцыятарам і актыўным удзельнікам шматлікіх патрыятычных акцый, якія право-дзяцца ў цеснай узаемасувязі з іншымі грамадскімі арганізацыямі патрыятычнай накіраванасці, органамі выканаўчай улады. Члены аб’яднання прынялі самы актыўны ўдзел у падрыхтоўцы і правядзенні выбараў дэпутатаў Палаты прадстаўнікоў Нацыянальнага сходу Рэспублікі Беларусь. Ветэраны Узброеных Сіл удзельнічалі ў навукова-практычных канферэнцыях, святочных шэсцях, вахтах памяці, уроках мужнасці, арганізоўвалі сустрэчы ў навучальных установах і ў вайсковых часцях.
Аднымі з найважнейшых мерапрыемстваў у 2020 годзе стануць: святкаванне 75-годдзя Перамогі савецкага народа ў Вялікай Айчыннай вайне, выбары Прэзідэнта Рэспублікі Беларусь, акрамя таго плануецца правядзенне шэрага навукова-практычных канферэнцый.
Па выніках працы ў мінулым го-дзе за садзейнічанне ў падтрыманні належнай абараназдольнасці краіны, ваенна-патрыятычнае выхаванне насельніцтва, уцягванне афіцэраў запасу і ў адстаўцы ў актыўную грамадскую работу з падрастаючым пакаленнем, умацаванне Беларускага саюза афіцэраў Брэсцкую абласную арганізацыю ўзнагародзілі пераходзячым Чырвоным сцягам. Віцебская і Мінская абласныя арганізацыі БСА ўзнагароджаны граматамі, група актывістаў – каштоўнымі падарункамі. Была адзначана і работа Капыльскай раённай арганізацыі БСА за супрацоўніцтва з ДТСААФ. Ад цэнтральнага савета ДТСААФ старшаму прапаршчыку запасу Аляксандру Пякарскаму ўручана грамата за значны ўклад у ваенна-патрыятычнае выхаванне грамадзян Рэспублікі Беларусь і актыўны ўдзел у правядзенні дзяржаўных мерапрыемстваў і мерапрыемстваў ДТСААФ.
Барыс ДЗЕНІСЮК, член ГА «Беларускі саюз журналістаў»
