28 спартсменаў на чале з трэнерамі-выкладчыкамі ўстановы «ДЮСШ Капыльскай РПА БПС работнікаў АПК» Дзмітрыем Булам, Таццянай Грынкевіч і трэнерам-выкладчыкам ДУ «Капыльская СДЮШАР» Анатолем Сенюком прынялі ўдзел у спаборніцтве, дзе на старт выйшла 177 удзельнікаў са спартыўных школ Капыльскага, Лагойскага, Барысаўскага, Мядзельскага і Нясвіжскага раёнаў. Па выніках усіх этапаў першае месца ў агульнакамандным заліку заваявалі капыляне з агульным вынікам 81 ачко. На другім месцы Барысаўскі раён (80 ачкоў), на трэцім — Лагойскі (79).
Трэба адзначыць, што нядрэнныя вынікі паказалі нашы землякі і ў асабістым першынстве. Перамогу святкавалі выхаванцы Дзмітрыя Була - Аляксей Захарчэня, які выступаў сярод юнакоў 2006 г.н. і маладзей, а таксама Арцём Холад ва ўзроставай катэгорыі 2002-2003 г. н. Бронзавым прызёрам сярод дзяўчат 2002-2003 г. н. стала выхаванка Анатоля Сенюка Ірына Фядотава. Ацэньваючы выступленні капыльскіх лыжнікаў, намеснік дырэктара ДЮСШ Наталля Шатыка адзначыла, што хлопцы выступілі нядрэнна і астатнія навучэнцы патрапілі ў верхнія радкі пратаколаў спаборніцтва.
Таццяна БОХАН
