Удзел у гутарцы прынялі таксама запрошаныя прадстаўнікі раённых структур - кіраўнік спраў райвыканкама Алена Міхайлоўская, начальнік аддзела ідэалагічнай работы, культуры і па справах моладзі Ларыса Юхо і намеснік начальніка ўпраўлення па працы, занятасці і сацыяльнай абароне Валянціна Давідчык.
Выступаючы перад прысутнымі, старшыня раённага Савета ветэранаў Людміла Каменка адзначыла, што ў год святкавання Вялікай Перамогі галоўнае - дайсці да кожнага ветэрана і актывізаваць працу з ветэранамі працы. Таму раённы Савет ветэранаў сваю працу па ўсіх напрамках будуе ў цесным узаемадзеянні з раённай уладай, з многімі раённымі службамі, грамадскімі арганізацыямі. Менавіта такое супрацоўніцтва дазваляе прыцягнуць да агульнай справы прадстаўнікоў самых розных узростаў, аб'яднаць іх агульнымі інтарэсамі, заахвоціць да актыўнай жыццёвай пазіцыі і ініцыятывы. Прыемна было пачуць з вуснаў старшыні Савета ветэранаў аб цесным узаемадзеянні і супрацоўніцтве ветэранскай арганізацыі і газеты «Слава працы», на старонках якой асвятляецца актыўная дзейнасць ветэранаў.
Як адзначыла ў прывітальным слове Рэгіна Кузьміч, адна з галоўных задач ветэранскіх арганізацый - паляпшэнне жыцця ветэранаў, а таксама абарона іх сацыяльна-эканамічных інтарэсаў. Для гэтых людзей вельмі важна ведаць, што яны не забыты.
- Сёння ветэранскія арганізацыі карыстаюцца аўтарытэтам сярод насельніцтва — падкрэсліла Рэгіна Станіславаўна. - І ваш раённы Савет ветэранаў - прыклад для пераймання. Гэта відаць з актыўнай дзейнасці па ўсіх напрамках. У вас змяніўся лідэр, і можна ўпэўнена сказаць, што ўзначаліў Савет чалавек з актыўнай жыццёвай пазіцыяй, які ўмее павесці за сабой, з'яднаць ветэранаў і прадстаўнікоў падрастаючага пакалення і накіраваць іх намаганні на добрыя справы.
Сапраўды, 2019 год быў па-свойму знакавым, але бягучы год будзе таксама напоўнены падзеямі: 75-я гадавіна Перамогі савецкага народа ў Вялікай Айчыннай вайне, абласная справаздачна-выбарная канферэнцыя і палітычная кампанія - выбары Прэзідэнта Рэспублікі Беларусь. Па словах выступоўцаў, ветэранская арганізацыя праводзіць плённую працу з моладдзю, імкнецца аказаць пасільную дапамогу ў любой справе, заўсёды знаходзячыся ў эпіцэнтры галоўных падзей. Яе члены ўваходзяць у склад выбарчых камісій, ініцыятыўных груп, іх надзейнае плячо ўлада адчувае заўсёды.
Кіраўнік справамі райвыканкама Алена Міхайлоўская і начальнік аддзела ідэалагічнай работы, культуры і па справах моладзі Ларыса Юхо падзякавалі ветэранам за актыўную працу, выказаўшы ўпэўненасць, што тыя традыцыі і добрыя справы, якія зроблены ў мінулым годзе, не толькі працягнуцца, але і прымножацца.
Прыемным момантам сустрэчы стала віншаванне лідара Савета ветэранаў з уручэннем «Знака Пашаны» Федэрацыі прафсаюзаў Беларусі. Узнагароду днямі Людміле Каменка ўручыў намеснік старшыні Федэрацыі прафсаюзаў Беларусі Мікалай Мацюкевіч.
Таццяна БОХАН
