Праходзіла яна ў рамках міжведамаснай прафілактычнай акцыі «Сябруем з законам!», прафілактычнага праекта «Капыль - здаровы горад» і напярэдадні Міжнароднага дня барацьбы з наркаманіяй.
Падчас інтэлектуальнага рынга хлопцы развеялі міфы пра наркотыкі, высветлілі, чым так небяспечна залежнасць і якія наступствы ўжывання забароненых рэчываў. Асобная катэгорыя пытанняў датычылася прававых аспектаў і відаў адказнасці за злачынствы ў сферы незаконнага абароту наркотыкаў.
- Працэс гульні апынуўся для хлопцаў вельмі займальным. На некаторыя пытанні каманды адказвалі вельмі хутка, а над некаторымі даводзілася сур'ёзна падумаць, і толькі пасля дэталёвага абмеркавання знаходзіўся прыдатны і правільны адказ, - падкрэсліла начальнік інспекцыі па справах непаўналетніх Капыльскага РАУС Наталля Шах. - У канцы мерапрыемства камандам былі прапанаваны ключавыя словы, з выкарыстаннем якіх неабходна было скласці апавяданне на прапанаваную тэму.
Прыемна адзначыць, што моладзь раёна мае дакладнае ўяўленне аб наркаманіі, ўсведамляе яе наступствы. Гэта значыць, што ў маладых людзей фармуецца негатыўнае стаўленне да забароненых рэчываў.
- Захаванне і ўмацаванне здароўя дзяцей і моладзі ўваходзіць у лік найважнейшых дзяржаўных задач — адзначыла спецыяліст упраўлення па адукацыі, спорце і турызме райвыканкама Юлія Бурак. — Мы, арганізатары брэйн-рынга, перакананы ў неабходнасці праводзіць як мага больш падобных сустрэч, каб інфармаваць маладое пакаленне пра наступствы, якія цягнуць за сабой небяспечныя залежнасці, і тлумачыць дзейнае заканадаўства максімальна аператыўна і даступна.
У канцы гульні ўсе ўдзельнікі атрымалі памятныя прызы і дыпломы ад арганізатараў мерапрыемства — інспекцыі па справах непаўналетніх аддзела ўнутраных спраў і ўпраўлення адукацыі, спорту і турызму Капыльскага райвыканкама. Лепшай жа прызнана зборная каманда «Альфа».
Сяргей Козел