Асноўнымі мэтамі мерапрыемства з'яўляюцца вызначэнне ўзроўню ведаў у навучэнцаў па пытаннях забеспячэння бяспекі жыццядзейнасці, удасканаленне практычных навыкаў навучэнцаў дзейнічаць ва ўмовах НС у мірны час.
Згодна з умовамі конкурсу, удзельнікам трэба было «эвакуявацца» з задымленага памяшкання па ўмоўным сігнале пажарнай сірэны, знайсці вогнетушыцель згодна з планамі эвакуацыі, рэанімаваць умоўнага чалавека, патэлефанаваць у службу выратавання, знайсці ключ ад выхаду. Арганізатары спаборніцтваў - РАНС і ўпраўленне па адукацыі, спорце і турызме райвыканкама - зрабілі акцэнт на момантах, на якія хлопцы не заўсёды звяртаюць увагу, а менавіта размяшчэнне і змест планаў эвакуацыі з будынкаў, месца размяшчэння вогнетушыцеляў.
Радуе, што каманды паказалі не толькі веды і ўменні, але і згуртаванасць калектыву ў цяжкай сітуацыі. Іх праўдзівы пераможны вынік калі-небудзь пакажа выратаванае ўласнае ці чыёсцi жыццё. А гэты вынік магчымы толькі пры самавалоданнi, вытрымцы, упэўненасці. Усе гэтыя якасці набываюцца толькі на практыцы. Па выніках гульні высокі ўзровень падрыхтоўкі ў спаборніцтвах паказалі навучэнцы сярэдняй школы № 2 г. Капыля ім. Г. Гартнага і гімназіі № 1 г. Капыля ім. Н.У. Рамашка, якія перамогу падзялілі паміж сабой. Трэцяе месца заняла каманда сярэдняй школы № 3 г. Капыля.
Мяркуючы па ўсім, школьнікі практычны ўрок бяспекі засвоілі, бо галоўнае ў гульні - не перамога, а веды, якія яны набылі, хай і на ўсялякі пажарны выпадак.
Юлія БУРАК, галоўны спецыяліст аддзела вучэбнай, сацыяльнай і выхаваўчай працы, спорту і турызму ўпраўлення адукацыі, спорту і турызму райвыканкама